Quba hadisələri ilə bağlı daha bir məhkəmə prosesinə start verildi - FOTO

Bu gün Quba rayon məhkəməsində bu il martın 1-də Qubada törədilən iğtişaşlarla bağlı daha 7 nəfərin məhkəməsi başlayır. Quba rayon məhkəməsindən Lent.az-a verilən məlumata görə, hakim Fizuli Pənahovun sədrliyi ilə keçiriləcək iclasda Qəribov Səfər Fazil oğlu, Əmiraslanov Zimistan Əkrəm oğlu, Əliyev Akif Məmmədtağı oğlu, Əliyev Habil Əhməd oğlu, Dadaşov Telman Əfqan oğlu, Abdullayev Samir Alim oğlu və Əkbərov Məmmədhəsən Məmmədəli oğlunun cinayət təqibi ilə bağlı məhkəmə prosesinin hazırlıq iclası keçiriləcək.

Qeyd edək ki, təqsirləndirilən şəxslərdən yalnız Əliyev Habil Azərbaycan Respublikası CM-nin 127.2.3; 186.2.2; 233 və 315.2-ci maddələri ilə ittiham olunur. Müttəhimlərdən Qəribov Səfər Fazil oğlu, Əmiraslanov Zimistan Əkrəm oğlu, Əliyev Akif Məmmədtağı oğlu, Dadaşov Telman Əfqan oğlu, Abdullayev Samir Alim oğlu və Əkbərov Məmmədhəsən Məmmədəli oğlu isə CM-nin 186.2.1; 186.2.2;233 və 315.2 maddələrinin tələblərini pozmaqda təqsirləndirilirlər.
Təqsirləndirilən şəxslərdən 4 nəfər – S.Qəribov, Z.Əmiraslanov, A.Əliyev, H.Əliyev həbsdədir. Digər şəxslər barədə isə heç bir yerə getməmək haqqında iltizam qəti imkan tədbiri seçilib.