"Kamaz" qəza törətdi: 100-ə yaxın abonent qazsız qaldı

Bakının Sabunçu rayonunda “Kamaz” idarəetməni itirərək qaz xəttini əzib.

“Azəriqaz” İstehsalat Birliyindən Lent.az-a daxil olan məlumata görə, hadisə aprelin 14-ü saat 11 radələrində Bakıxanov qəsəbəsi, Yavər Əliyev küçəsi döngə-1 ünvanında baş verib. Avtomobil qəzası zamanı “Azəriqaz” İB-nin balansında olan qaz xətti və qaz tənzimləyici şkafa ciddi zərər dəyib.

Mənzil istismar sahələrindən birinə məxsus məişət tullantılarının daşınması ilə məşğul olan “Kamaz” markalı yük avtomobili idarəetmədən çıxaraq qaz tənzimləyici şkafa çırpılıb və qurğunu yararsız hala salıb. Bundan başqa 108 mm diametrində olan qaz xətti və 7 ədəd qaz sayğacı zədələnib. Təhlükəsizlik tədbirləri olaraq 100-ə yaxın abonentin qaz təchizatı müvəqqəti olaraq dayandırılıb.