Tehran hakimiyyəti “Qurtuluş” sözündən qorxur

Güney Azərbaycanın, Şərqi Azərbaycan əyalətinin Nadarlı kəndində bir qrup gənc yaratdıqları futbol komandasına “Qurtuluş” adını verib.

Lent.az-ın “Oyannews.com”-a istinadən məlumatına görə, Tehran hakimiyyəti buna qarşı çıxıb. ETTELAAT məsələyə müdaxilə edib.

“Qurtuluş”un oyunçuları “Ramazan kuboku” uğrunda keçirilən futbol yarışına üzərində Azərbaycan türkcəsində “Qurtuluş” yazılmış geyimdə çıxıblar. Bu, komandanın təşkilatçılarından olan Nadarlı kənd sakini Mürtəza Nurməhəmmədinin həbsi ilə nəticələnib.

ETTELAAT-ın Şəbüstər rayonu şöbəsinin əməkdaşları (Nadarlı kəndi bu rayonuda yerləşir) iyulun 14-də Murtuza Nurməhəmmədini tutaraq şöbəyə aparıblar.

Mürtəza Nurməhəmmədi şöbədə dindirilib, ondan üzərində “Qurtuluş” sözü yazılmış köynəklərdən bir daha istifadə etməyəcəkləri barədə yazılı iltizam alınıb.

Bir sutka şöbədə saxlandıqdan sonra Mürtəza Nurməhəmmədi iyulun 15-də sərbəst buraxılıb. Onun dindirilərkən psixi təzyiqlərə məruz qoyulduğu, təhdid edildiyi bildirilir.

Xatırladaq ki, panfarsizm İranda hakimiyyətə gətirildikdən bəri, Rza şah Pəhləvinin dövründən başlayaraq, Azərbaycan türkcəsində olan bütün adlar yasaqlanıb. Türkcə yer adları farslaşdırılıb, valideynlərin övladlarına türkcə ad qoymasına icazə verilmir və s.