Ukrayna SQ Rusiya ordusunun mühüm obyektlərini məhv etdi - Baş Qərargah

Ukrayna aviasiyası son sutka ərzində düşmənin şəxsi heyəti və hərbi texnikasının cəmləşdiyi ərazilərə 10 zərbə endirib. Ukrayna müdafiəçiləri həmçinin müxtəlif tipli 4 hücum və 7 kəşfiyyat PUA-nı məhv etməyə müvəffəq olublar.

Lent.az-ın Ukrayna SQ Baş Qərargahına istinadən verdiyi məlumata görə, Ukrayna Silahlı Qüvvələrinin raket və artilleriya bölmələri 4 silah və hərbi texnikanın cəmləşdiyi ərazini, 1 sursat anbarını, atəş mövqelərində 4 artilleriya qurğusunu, 1 hava hücumundan müdafiə sistemini və daha 1 mühüm hədəfi vurub.

Eyni zamanda, Rusiya ordusu Ukrayna Silahlı Qüvvələrinin mövqelərinə və yaşayış məntəqələrinə 7 raket və 70 hava zərbəsi endirib, çoxsaylı reaktiv yaylım atəş sistemlərindən 48 hücum həyata keçirib. Baş Qərargahın bəyanatında deyilir ki, nəticədə mülki əhali zərər çəkib, fərdi yaşayış binaları və digər mülki infrastruktur dağıdılıb və zədələnib.