Karzai Molla Öməri siyasi mübarizəyə çağırır

Əfqanıstanda 40 ilə yaxındır vətəndaş savaşı davam edir. Lent.az-ın “svobodanews”-a istinadən məlumatına görə, ölkə prezidenti Həmid Karzai taliblərin lideri Molla Öməri hakimiyyətə qarşı savaşmaqdansa, prezident seçkisində namizədliyini irəli sürməyə, bu post uğrunda siyasi mübarizə aparmağa çağırıb.

Ötən gün H.Karzai jurnalistlər qarşısında çıxışı zamanı Molla Ömərin öz siyasi partiyasını yaradaraq, Əfqanıstan ofisini açıb, seçkilərə qatıla bilməsindən danışıb.

Qeyd edək ki, 2001-ci ildə ABŞ-ın başçılığı ilə beynəlxalq qüvvələr Əfqanıstanda Molla Ömərin Taliban hökumətini devirdikdən sonra onun yer məlum deyil. Amerika Molla Ömərin qaldığı yer haqda informasiya verəni 10 milyon dollar məbləğində mükafatlandıracağını boyun olub.

Prezident Karzai isə dəfələrlə Molla Ömər və başqa yaraqlıları silahı yerə qoyub, dinc proseslərə qatılmağa çağırıb. Ancaq taliblər onun çağırışlarına məhəl qoymurlar. Hətta bu ilin əvvəlində ABŞ-la başlanan ilkin danışıqları da yarımçıq kəsiblər.

Sədrəddin Soltan