Ağ saçların yaranması yaşlanmanın təbii əlamətlərindən biridir və gec-tez demək olar ki, hər kəs bununla qarşılaşır. Lakin saçını tez-tez boyamaq istəməyənlər, xüsusilə ağ saçları az olan insanlar təbii qulluq üsullarına üstünlük verirlər. Xalq arasında uzun illərdir istifadə olunan vasitələrdən biri də adi sodadır.
Lent.az xəbər verir ki, mütəxəssislərin fikrincə, soda ağ saçları əvvəlki rənginə qaytarmasa da, onları daha az nəzərə çarpan edə, saçın parlaqlığını artıraraq ümumi görünüşünü yaxşılaşdıra bilər.
Soda saçlara necə təsir edir?
Vaxt keçdikcə saçlarda lak, köpük və digər kosmetik vasitələrin qalıqları toplanır. Bu isə saçın mat görünməsinə və ağ tellərin daha qabarıq seçilməsinə səbəb ola bilər. Soda yumşaq təmizləyici təsir göstərərək bu qalıqları aradan qaldırmağa kömək edir. Nəticədə saç daha təmiz, həcmli və parlaq görünür. Bundan əlavə, soda sərt su, günəş şüaları və ya siqaret tüstüsü nəticəsində ağ saçlarda yaranan sarımtıl çaları da müəyyən qədər neytrallaşdıra bilir.
Sodadan necə istifadə etmək olar?
Evdə qulluq üçün bir xörək qaşığı qida sodasını az miqdarda ilıq su ilə qarışdıraraq pasta halına gətirmək kifayətdir.
Hazırlanan qarışıq nəm saçlara və baş dərisinə yüngül masaj hərəkətləri ilə çəkilir. Təxminən 2-3 dəqiqə saxlandıqdan sonra saç ilıq su ilə yaxşıca yuyulur. Mütəxəssislər bu proseduru 10-14 gündə bir dəfədən çox etməməyi tövsiyə edirlər. Çünki sodadan həddindən artıq istifadə saçları quru və kövrək edə bilər.
Soda və qəhvə qarışığı
Ağ saçları vizual olaraq gizlətmək üçün istifadə olunan məşhur üsullardan biri də soda ilə təbii üyüdülmüş qəhvənin qarışığıdır.
Bunun üçün 1 çay qaşığı qida sodası, 2 xörək qaşığı təbii üyüdülmüş qəhvə və az miqdarda ilıq su lazımdır.
Hazırlanan qarışıq saçlara çəkilir, təxminən 20 dəqiqə saxlandıqdan sonra yuyulur. Qəhvə saçlara yüngül tünd çalar verdiyi üçün ağ tellər daha az görünür. Bu üsul xüsusilə şabalıdı və tünd sarı saçlı insanlar üçün daha uyğundur.
Qara çay və soda
Digər məşhur ev üsulu qatı dəmlənmiş qara çaydan istifadə etməkdir. Saç yuyulduqdan sonra qara çay dəmi ilə yaxalanır, daha sonra isə baş dərisi zəif soda məhlulu ilə təmizlənir.
Bu üsul saç rənginin daha dolğun görünməsinə və ağ saçların kontrastının azalmasına kömək edə bilər.
Sodanın digər faydaları
Qida sodası yalnız saçın görünüşünü yaxşılaşdırmaqla kifayətlənmir. O, həmçinin saç dibindəki artıq yağı azaltmağa, baş dərisində qaşınmanı yüngülləşdirməyə, saç düzüm vasitələrinin qalıqlarını təmizləməyə, saça əlavə həcm və təbii parlaqlıq verməyə kömək edir.
Bununla belə, dermatoloqlar qeyd edirlər ki, sodanın saçın təbii qoruyucu qatını zəiflətmə riski olduğundan, onu tez-tez istifadə etmək məsləhət görülmür. Baş dərisi həssas olan və ya saçları quru olan şəxslər bu üsulu tətbiq etməzdən əvvəl ehtiyatlı olmalı, zərurət yarandıqda dermatoloq və ya trixoloqla məsləhətləşməlidirlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
