Qadınların eşitmə qabiliyyəti kişilərlə müqayisədə daha HƏSSASDIR

Fransa və Böyük Britaniyadan olan alimlər kişilərin və qadınların eşitmə qabiliyyətini müxtəlif ölkələrdən olan insanlarda araşdırıblar. Araşdırmada Ekvador, İngiltərə, Qabon, Cənubi Afrika və Özbəkistandan olan 448 sağlam böyüklər iştirak edib. Alimlər, həmçinin, mümkün qədər fərqli bölgələrdən olan insanları dəvət ediblər: dağ kəndlərindən tutmuş səs-küylü megapolislərə qədər.

Lent.az bu mövzu ilə bağlı maraqlı məlumatları sizə təqdim edir:

Tədqiqatçılar eşitmə qabiliyyətinə bioloji və ətraf mühitin necə təsir etdiyini öyrənmək qərarına gəldilər. Eşitmə testi xüsusi bir test vasitəsilə ölçüldü. Xüsusən "transiyent təhrikedici otoakustik yayılmalar" adlı testdən istifadə olundu. Bu test insanın hərəkətsiz olduğu zaman səsə reaksiyanı qiymətləndirməyə imkan verib. Proses belədir: cihaz qulaqda bir klik səsi səsləndirir, sonra daxili qulaq tərəfindən cavab olaraq göndərilən zəif eşidilən səslər qeydə alınır. Testin nəticələri göstərdi ki, bütün qruplarda qadınların eşitmə qabiliyyəti kişilərlə müqayisədə daha həssasdır. Orta göstərici iki desibeldən yüksək idi. Həmçinin, müxtəlif tezliklərlə aparılan eksperimentlərdə də bu meyl müşahidə olunub. Beləliklə, qadınlar hər halda daha həssasdırlar. Bu xüsusiyyət, yaş və yaşadıqları yerə baxmayaraq sabit olaraq qalır.

Alimlər bu nəticələri qadınların bioloji xüsusiyyətləri ilə əlaqələndirirlər. Həmçinin, hansısa mədəniyyətə mənsub olmaq bu xüsusiyyətə təsir etmir. Test həmçinin göstərdi ki, eşitmə qabiliyyəti yaşayış yerinə görə dəyişir. Belə ki, iri şəhərlərin sakinləri daha yüksək tezlikləri daha yaxşı qəbul edirlər. Bunun səbəbi, orada insanların nəqliyyatın səsi və digər səs-küylərə alışmış olmaları ilə bağlı ola bilər. İndi isə müəlliflər dünyadakı insanların eşitmə qabiliyyətini öyrənməyə davam etməyi planlaşdırırlar. Xüsusilə alimlər yeni səs mühiti ilə genetik uyğunlaşma mövzusunu araşdırmaq istəyirlər.

Böyük Britaniyanın Bath Universitetindən olan və araşdırmanın həmmüəllifi olan professor Turi Emma King qeyd edib ki, insanlar təkamül etməyə davam edirlər, buna görə də ətraf mühitin ümumilikdə eşitmə qabiliyyətimizə necə təsir etdiyini və ya bunun genetik uyğunlaşma ilə əlaqəli olub-olmaması məsələsini araşdırmaq vacibdir. Ümumdünya Səhiyyə Təşkilatının proqnozlarına görə, 2050-ci ilə qədər təxminən 2,5 milyard insan eşitmə problemlərindən əziyyət çəkəcək. Lakin, eşitmə qabiliyyətini qorumaq üçün yollar mövcuddur.