2785
17:23
13 Avqust 2020

Müəllimlərin əksəriyyəti yaşına görə risk qrupuna daxildir - Təhsil İnstitutu

“Tədris prosesinə cəlb edilən müəllimlərin böyük əksəriyyəti yuxarı yaş qrupuna aiddirlər və pandemiyaya görə nisbətən yüksək risk daşıyıcılarıdırlar”.

Lent.az xəbər verir ki, bu barədə Təhsil İnstitutunun COVID-19 şəraitində yeni tədris ilində təhsil müəssisələrinin fəaliyyətinin təşkil ilə bağlı təklif və tövsiyələri əks etdirən elmi araşdırmasında bildirilib.

Qeyd olunub ki, yüksək risk qrupuna aid müəllimlərin sağlamlığının qorunması vacib prioritetlərdən biri olmalıdır: “Ümumtəhsil müəssisələrində çalışan işçilərdən 20 yaşadək 135 nəfər (0.1 faiz), 20-30 yaş arasında olanlar 24 862 nəfər (12 faiz), 30-40 yaş arasında olanlar 61 126 nəfər ( 28 faiz), 40-50 yaş arasında olanlar 47 887 nəfər (22 faiz), 50-60 yaş arasında olanlar 55 477 nəfər ( 26 faiz), 60 və daha yaşlı olanlar 25 778 nəfərdir (12 faiz).

Məlumatda qeyd olunub ki, Tibbi Ərazi Bölmələrini İdarəetmə Birliyi (TƏBİB) 28 iyul 2020-ci ilə olan tarixə qədər yoluxanların yaş qrupuna görə bölgüsünü təqdim edib. Bölgüyə əsasən, COVID-19 pandemiyası zamanı virusa yoluxanların 18%-i 30-39 yaş aralığında, 15%-i 40-49 yaş aralığında, 21%-i 50- 59 yaş aralığında, 16%-i 60-69 yaş aralığında yerləşir. Bu isə orta və daha yuxarı yaş kateqoriyasından olan əhali qruplarının yoluxma sayı və ehtimalının böyük olmasının göstəricisidir.