2720
00:18
08 Avqust 2020

Hacıqabulda qaz xəttində yanğın söndürüldü - FOTO - VİDEO - YENİLƏNİB

Hacıqabul-Qalmaz qaz kəmərində yanğın avqustun 7-də saat 20.35-də Hacıqabul rayonu ilə sərhəd olan Abşeron rayonunun çöllük ərazisində qeydə alınıb.

APA-nın Mil-Muğan bürosunun məlumatına görə, Hacıqabul magistral qaz kəmərləri sahəsindən Qalmaz yeraltı qaz anbarını birləşdirən 750 mm diametrlik yüksək təzyiqli qaz kəmərində baş verən yanğın 3 saata qədər davam edib.

Hadisə yerinə Fövqəladə Hallar Nazirliyinin Dövlət Yanğından Mühafizə xidmətinin əməkdaşları cəlb olunub.

Boru xəttində qazın verilişi dayandırılıb və təxminən 23.30-da kəmərdə yanğın söndürülüb. Hadisə yerinə hüquq-mühafizə orqanlarının əməkdaşları, “Azəriqaz” ASC-nin mütəxəssisləri və məsul şəxslər cəlb olunub.

Qəzanın başvermə səbəbləri araşdırılır. Hadisə nəticəsində xəsarət alan olmayıb.

***

22:43

Hacıqabul rayonu ərazisindən keçən diametri 750 mm-lik Hacıqabul-Qalmaz qaz boru xəttində yanğın baş verib.

Bu barədə APA-nın Mil-Muğan bürosu məlumat verib.

Fövqəladə Hallar Nazirliyinin Dövlət Yanğından Mühafizə Xidmətinin yanğından mühafizə bölmələri hadisə yerinə cəlb olunub.

***

22:02

İlkin məlumata əsasən, Hacıqabul rayonunda çöllük ərazidə qaz xəttində yanğın baş verib.

Bu barədə APA-ya Fövqəladə Hallar Nazirliyindən bildirilib.

Nazirliyin Dövlət Yanğından Mühafizə Xidmətinin yanğından mühafizə bölmələri hadisə yerinə cəlb olunub, aidiyyəti qurumlar məlumatlandırılıb.

***

21:16

Hacıqabul rayonu ərazisində yanğın başlayıb.

APA-nın məlumatına görə, hadisə Nəvai qəsəbəsində qeydə alınıb.

Hadisə yerinə Fövqəladə Hallar Nazirliyinin yanğından mühafizə bölmələri cəlb edilib.

Dİgər xəbərlər