467
12:17
29 Mart 2020

"Asan İmza" sertifikatlarının etibarlılıq müddəti bu tarixə kimi uzadıldı

“Asan İmza” mobil elektron imzanın milli operatoru və Azərbaycanın Rəqəmsal Ticarət Qovşağının partnyoru olan B.EST Solutions şirkəti koronavirus epidemiyasının (COVID-19) ölkənin iş mühitinə təsirini minimuma endirmək üçün uzaqdan işlərini davam etdirmək istəyən “Asan İmza” istifadəçiləri və sahibkarların müraciətlərinə cavab olaraq gücləndirilmiş iş rejimində işləyir.

“Asan Xidmət”in mətbuat mərkəzindən Lent.az -a daxil olan məlumatda bildirilir ki, qısa müddətdə Vergi Xidməti ilə birlikdə fiziki şəxslər, şirkət rəhbərləri olan hüquqi şəxslər və sahibkarlıq fəaliyyətilə məşğul olan fiziki şəxslər, həmçinin rəhbər olan dövlət qulluqçuları üçün “Asan İmza” sertifikatlarının etibarlılıq müddətinin aprel ayının 1-dən mayın 31-dək ödənişsiz olaraq avtomatik uzadılır. Həmçinin qeyd olunan müddət ərzində abunə haqlarından azad olunması məqsədilə müvafiq dəyişikliklər həyata keçirilib. “Asan İmza” biznes sertifikatlarının digər sahibləri öz sertifikatlarının müddətini onlayn qaydada asxm.gov.az portalı vasitəsilə uzada biləcəklər. Müəyyən edilmiş müddət ərzində Vergi Xidməti tərəfindən bu istifadəçilərə sertifikatlarının müddətinin 31 may tarixinədək uzadılması ilə bağlı ismarıclar göndəriləcək.

Ölkə prezidenti tərəfindən yaradılan davamlı Rəqəmsal Azərbaycan platforması ölkə iqtisadiyyatının dəstəklənməsi üçün fəal şəkildə istifadə olunmalıdır. Distant işə keçməklə “Asan İmza” evdən çıxmadan elektron hökumətin onlayn xidmətlərinə, onlayn bankinq xidmətlərinə təhlükəsiz və effektli əlyetərliyi, müqavilələrin onlayn şəkildə imzalanmasını təmin edəcək. Əgər xarici partnyorla müqavilə bağlamağınız vacibdirsə, ona Azərbaycanın m-Rezidenti olmağı təklif edin. Rəqəmsal Azərbaycan dünyadakı koronavirus pandemiyasının nəticələrini aradan qaldırmağa kömək etməli, sahibkarların və vətəndaşların zərər görməməsi üçün bütün imkanları səfərbər etməlidir.

“1847” Asan İmza Çağrı Mərkəzi adi rejimdə öz işini davam etdirir.

Suallarınız olduqda [email protected] ünvanı vasitəsilə əlaqə saxlaya bilərsiniz.