665
16:15
26 Dekabr 2019

Sığınacaqdakı qadınlar pullarını özləri qazanacaq - YENİ LAYİHƏ

“Təmiz Dünya” Qadınlara Yardım İctimai Birliyi Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının növbəti 2019-cu il üzrə 5-ci qrant müsabiqəsi çərçivəsində, Daxili İşlər Nazirliyi və nazirliyin İnsan alverinə Qarşı Mübarizə Baş İdarəsi ilə birgə “İnsan alverinin qurbanları və potensial insan alveri qurbanları üçün sığınacağın fəaliyyətinin gücləndirilməsi” üzrə layihənin icrasını davam etdirir.

Lent.az xəbər verir ki, layihənin müddəti 3 aydır və layihə çərçivəsində 30 nəfərin reabilitasiya və reinteqrasiyası prosesinə cəlbi nəzərdə tutulub. Layihə çərçivəsində reabilitasiya və reinteqrasiya prosesi ilə yanaşı, sığınacaq sakinlərinə dərzilik üzrə peşə bacarıqlarının artırılması fəaliyyətini könüllü həyata keçirmək planlaışdırılıb. Layihənin gedişində 16 günlük gender zorakılığı ilə mübarizə aktivliyi ərəfəsində İsveç səfirliyi ilə danışıqlar aparılıb. Fəaliyyəti daha mütəşəkkil və effektiv etmək üçün razılığa gəlinib.

Razılığa əsasən, səfirliyin əməkdaşlıq etdiyi Azərbaycan Mirkomaliyyə Assosiasiyanın törəmə müəsissəsi “Finance and Sosial İnnovation Consulting” MMC sığınacaq sakinlərinə sahibkarlıq fəaliyyəti üzrə ümumlikdə 25 nəfərə 5 günlük təlimlər keçdi. Sonra qeyd edilən şirkətin təhkim etdiyi peşəkar dərzi ustası sakinlərə praktik olaraq bir aylıq dərzilik sənətinin bütün incəliklərini öyrətdi. Tədrisin sonunda artıq 12 nəfər sərbəst şəkildə, tikmə, biçmə bacarıqlarına nail oldu. Sığınacaq sakinlərinin keçdiyi təlim və dərzilik kursunun nəticəsi olaraq İsveçrə Konfederasiyasının Azərbaycandakı fövqəladə səfiri xanım Murel Peneveyre iştirakçılara sertifikat təqdim edib.

Layihənin müddəti bitsə də, artıq gələcəkdə qeyd edilən fəaliyyətləri davam etmək üçün müəyyən texniki imkanlar həm Azərbaycan Prezidenti yanında QHT Dövlət Dəstəyi Şurasının vəsaiti hesabına, həm İsveçrə Konfederasiyasının Azərbaycandakı səfirliyinin hədiyyə etdiyi peşə bacarıqlarının inkişafına (dərzilik) avadanlıqları bu fəaliyyətin davamlılığını təmin etmiş olacaq.

Artıq sığınacağa daxil olan şəxslər reabilitasiya dövründə paralel olaraq peşə bacarıqlarına yiyələnərək sığınacağı tərk etdikdə müstəqil olaraq həyatını idarə etməyi, iqtisadi azad olmağı təmin edə biləcəklər.

Layihə yekunlaşsa da fəaliyyət davam edir. Həyata keçirilən layihənin yeniliyi, reabilitasiya və reinteqrasiyanın paralelliyini təmin etməyə yeni imkanlar yaradıb.

Qeyd edək ki, 3 ay müddətinə 30 qadın və 45 uşaq layihədən bəhrələnib.