"Samsung Galaxy Z Fold 7" təqdim olundu

Samsung, daha incə və daha geniş dizayna malik yeni qatlana bilən telefonu “Galaxy Z Fold 7”ni təqdim edib.

Lent.az xəbər verir ki, yeddinci nəsil qatlana bilən telefonlarını elan edərək, Samsung nəhayət çoxdan tənqid edilən, uzun müddət dar olan “Galaxy Z Fold” dizaynından əl çəkib.

Bir müddət əvvəl “Fold 7”nin daha incə olacağı artıq məlum idi. “Fold 6” ilə müqayisədə fərq gecə və gündüz kimidir. Beləliklə yeni “Galaxy Z Fold 7” daha incə və yüngüldür, “Fold 6” isə onun yanında böyük bir kərpic kimi görünür.

Qatlandığı zaman qalınlığı 8,9 mm olan cihaz incəliyinə görə bazarın ən iddialı modelləri; məsələn, “Oppo Find N5” ilə rəqabət aparır.

Cihazın qapaq ekranı indi 6,5 düymdür və 2520 x 1080p təsvir ölçüsünə malikdir. “Fold 6” da isə bu ölçü 6,3 düym idi.

Telefonun daxili ekranı isə indi 8 düymdür. Şirkət cihazın bu qədər incə edilməsi zamanı “S Pen” dəstəyindən güzəştə gedib.

Telefonun suya və toza qarşı müqaviməti IP48 sertifikatı ilə əvvəlki iki modellə eyni qalır.

Qiymətə gəlincə isə “Galaxy Z Fold 7”nin başlanğıc qiyməti 1999 dollar olaraq açıqlanıb.

Telefonun əsas parametrləri bunlardır:

Ekran ölçüsü (xarici): 6,5 düym

Ekran növü: AMOLED

Ekran imkanları: 2184 x 1968 (daxili ekran) və 2520 x 1080 (qapaq ekranı)

Əsas arxa kamera: 200 MP (f/1.8)

Ultra geniş kamera: 12 MP (f/2.2)

Telefoto kamera: 10 MP (f/2.4) (3x optik zoom)