“Bu il növbədə olan bütün vətəndaşlar avtomobillə təmin olunacaq” - YENİLƏNİB

Əmək və əhalinin sosial müdafiəsi naziri Səlim Müslümov Şirvanda vətəndaşları qəbul edib. Nazirliyin ictimaiyyətlə əlaqələr sektorundan Lent.az-a verilən məlumata görə, görüşdə Şirvan sakinləri ilə yanaşı, Hacıqabul, Sabirabad, Saatlı rayonlarının sakinləri də iştirak edib.

Ümumilikdə 50 nəfərdən çox vətəndaşın müraciəti dinlənilib və hər bir müraciət nazirliyin aidiyyatı mütəxəssislərinin iştirakı ilə obyektiv şəkildə araşdırılıb. Əksər müraciətlərdə əksini tapan məsələlər yerindəcə həll olunub. Ayrı-ayrı əlil şəxslərin əlil arabaları ilə təmin edilməsi, bərpa-müalicəsinə ehtiyacı olan imtiyazlı vətəndaşlara nazirliyin bərpa müəssisələrinə göndərişlərin, habelə sanator-kurort yollayışlarının verilməsi barədə tapşırıqlar verilib.

İşsiz olduqlarını bildirən şəxslərin məşğulluğunun qısa vaxtda təmin edilməsi, lazım gəldikdə həmin şəxslərin peşə hazırlığı kurslarına cəlb edilməsi üçün yerli məşğulluq orqanlarına aidiyyatı tədbirlər görmələri tapşırılıb. Dövlət hesabına mənzillə və avtomobillə təmin olunmaq üçün müraciət edən imtiyazlı şəxslərə məhz növbəlilik prinsipi əsasında mənzil və avtomobil ala biləcəkləri, növbəyə dayanmaq üçün isə aidiyyatı icra hakimiyyəti orqanına müraciət etməli olduqları bildirilib.

Görüşdə nazir onu da qeyd edib ki, prezident İlham Əliyevin tapşırığına uyğun olaraq bu il bütün avtomobil növbəsində olan vətəndaşlar avtomobillə təmin olunacaq. Eyni zamanda, bəzi vətəndaşların müraciətlərinə uyğun olaraq, onların yerli tibbi-sosial ekspert komissiyaları tərəfindən əlillik müayinəsinə cəlb olunmaları, ailələrinin ünvanlı yardım almaq hüququnun olub-olmamasının araşdırılması barədə göstərişlər verilib.

Müraciətlərin bir qismi isə nazirliyin səlahiyyətlərinə aid olmayan məsələləri əhatə edib. Vətəndaşlara həm hüquqi, həm də digər mümkün köməkliklərin edilməsi üçün həmin müraciətlərin müvafiq qurumlara çatdırılacağı bildirilib. S. Müslümov vətəndaşlarda haqlı narazılıq yaradan hallarla bağlı ciddi inzibati tədbirlərin görülməsi, nazirliyin yerli strukturlarında hər bir vətəndaşın müraciətinə diqqət və həssaslıqla yanaşılması və s. barədə tapşırıqlar verib.

Qeyd edək ki, Hacıqabul, Sabirabad, Saatlı rayonlarından qəbula yazılmış vətəndaşların həmin rayonların ƏSMM-lərinin inzibati binalarının qarşısından xüsusi ayrılmış nəqliyyatla Şirvan şəhərinə aparılıb gətirilmələri təmin edilib.