"Qiyamət günü bunkeri": Üçüncü Dünya Müharibəsi başlasa, ən zəngin insanların gizlənəcəyi yer

625 nəfər üçün 300 milyon dollar dəyərində lüks sığınacaq 2026-cı ildə açılacaq.

Amerikanın SAFE şirkəti Apokalipsis vəziyyətində dəbdəbəli sığınacaq tikintisi planını təqdim edib.

Lent.az-ın xarici mediaya istinadla xəbərinə görə, bunker ABŞ-da, Vaşinqton yaxınlığında tikiləcək. Qlobal fəlakət baş verərsə, bu yeraltı qalada 20 milyon dollara əvvəlcədən özlərinə yer alacaq 625 nəfər yerləşəcək.

"Aerie adlanan yeraltı bunker müştərilərə yerüstü fəlakətdən sağ çıxmaq şansı verəcək, hər birinə 20 milyon dollara başa gələcək. Yeni sığınacaq Vaşinqtondakı Ağ evin yaxınlığında yerləşsə də, layihə menecerləri obyektin yerinin sadəcə "təsadüf" olduğunu və qlobal gərginlik və potensial Üçüncü Dünya müharibəsi qorxuları ilə heç bir əlaqəsi olmadığını israr edirlər", - məlumatda vurğulanır.

Qala son illərdə super zənginlər üçün tikilmiş bir sıra oxşar sığınacaqlardan yalnız biridir. Kim Kardaşyan, Mark Zukerberq və Tom Kruz öz sığınacaqlarını tikdiklərini və ya bu lüks bunkerlərdən birində yer sifariş etdiklərini etiraf ediblər.

Yaddaş köpüklü döşəklər və mərmər döşəmələrlə yanaşı, Aerie qonaqlara süni intellektlə işləyən tibbi yardım, saysız-hesabsız "sağlamlıq proqramları" və "qoruma və lüks" ün mükəmməl qarışığı da daxil olmaqla misilsiz imkanlar təqdim edəcək.

Sığınacaqda həmçinin bir neçə restoran, qapalı hovuz, boulinq meydançası və dırmaşma divarı olacaq. Nəhəng yeraltı qalanın tikintisi 300 milyon dollara başa gələcək. Bunkerdə tibbə xüsusi diqqət yetirilir. Şirkət sığınacağı süni intellektə əsaslanan alətlərlə təchiz olunmuş MediShield tibb mərkəzləri ilə təchiz edir.

"Şirkətin yüksək ixtisaslı tibbi mütəxəssislərdən ibarət komandası sizə Ağ evin tibb bölməsi ilə eyni standartları təqdim edəcək. Ən müasir robotik xidmətlər, yerləşdiyi yerdən asılı olmayaraq, birinci dərəcəli tibbi yardım və fövqəladə hallara cavab verir", - sığınacaq reklamında bildirilir.

Sığınacaq yerin dərinliklərində yerləşəcəyi üçün otaqlardakı divarlar və tavanlar interaktiv olacaq və psixoloji gərginliyi aradan qaldırmaq üçün “pəncərədən kənarda gözəl mənzərə” illüziyasını yaradacaq.

Layihə rəhbərləri qeyd ediblər ki, sığınacaq yerləri yalnız şəxsi dəvətlə alına bilər. Hazırda mümkün müştərilərin siyahısı hələ də müzakirə olunur. Virciniyadakı ilk bunkerdən sonra şirkət başqa ştatlarda daha bir neçə sığınacaq tikməyi planlaşdırır.

Tikinti bir neçə il çəksə də, sığınacaqla tanışlıq 2026-cı ildə baş tutacaq, bu zaman potensial müştərilər ziyarət edə və pullarını xərcləməyə dəyib-dəymədiyinə qərar verə biləcəklər.