Avqustda ekoloji hüquqpozmalarla bağlı 94 müraciətə baxılıb

Lent.az-ın nazirliyin rəsmi saytına istinadən yaydığı məlumata görə, müraciətlər ölkə ərazisində ətraf mühitin mühafizəsi ilə əlaqədar ekoloji tarazlığın qorunması, ekoloji qanun pozmaları və digər ekoloji hallar barədədir. Müraciətlər nazirliyin əməkdaşları tərəfindən yerində araşdırılaraq qanunamüvafiq tədbirlər görülüb. Belə ki, ağacların kəsilməsi ilə əlaqədar daxil olmuş 16 müraciət nazirliyin əməkdaşları tərəfindən yerində araşdırılıb, 7 şikayət üzrə fakt təsdiqlənib, qanunamüvafiq tədbirlər görülüb. 8 müraciət təsdiqini tapmayıb, 1 müraciət isə icradadır.

Ağacların aşma təhlükəsinin olması ilə əlaqədar daxil olmuş 42 müraciətə yerində baxış keçirilərək təhlükə yaradan ağaclarla bağlı müvafiq rəy və təkliflər verilib.
Məişət tullantılarının qalaqlanması, atmosfer havasının çirklənməsi, çirkab suların axıdılması, səs-küy, elektromaqnit şüalanması və meşələrin qanunsuz qırılması ilə əlaqədar daxil olmuş 36 müraciətdən 13-ü ilə bağlı qanunamüvafiq tədbirlər görülüb, 6 müraciət icradadır. 17 müraciət isə nazirliyin əməkdaşları tərəfindən keçirilmiş monitorinqlər zamanı təsdiqini tapmayıb və həmin ərazilər nəzarətə götürülüb.

Araşdırmalar zamanı daxil olan müraciətlərin əksəriyyətinin şəxsi xarakterli olduğu və fərdi konfliktləri həll etmək məqsədi daşıdığı məlum olub.