QHT-lərdən yazan jurnalistlər üçün treninq keçirilib

QHT-dən yazan jurnalistlərin şəbəkəsinin yaradılmasının vacibliyi bildirilib

İyunun 30-da Media İnkişaf Mərkəzi ictimai Birliyi QHT-lərə Dövlət Dəstəyi Şurasının sifarişi ilə həyata keçirdiyi “Azərbaycanda üçüncü sektorun inkişafında medianın rolunun artırılması” layihəsi çərçivəsində QHT-lərin işini peşəkar səviyyədə işıqlandıran jurnalistlərin hazırlanması yönündə ilk treninqi keçirib.

Ölkədə fəaliyyət göstərən yazılı, elektron və internet mediasının nümayəndələrinin iştirak etdiyi treninqdə QHT-lərin və bütövlükdə vətəndaş cəmiyyəti institutlarının fəaliyyətinin KİV-də işıqlandırılmasının vacib aspektlərinə toxunulub. Layihənin koordinatoru Səbinə Əvəzqızı bildirib ki, məqsəd QHT-lərin işindən və problemlərindən yazan jurnalistlərin bu işə peşəkar yanaşmasını, qanunvericiliyin və hüquqların, obyektivliyin təmin edilməsinə nail olmaqdır.

Treninq iştirakçıları bu istiqamətdə təcrübədə rastlaşdıqları faktlardan misallar çəkib və həmin halları birgə müzakirə ediblər.

Müzakirələrin gedişində QHT-dən yazan jurnalistlərin şəbəkəsinin yaradılmasının vacibliyi bildirilib.