İnternet saytları dövlət yardımından kənarda qaldı

Dövlət orqanlarının təsis etdikləri qəzetlər, internet saytları və televiziyalar media layihələri üzrə müsabiqədə iştirak edə bilməz

Kütləvi İnformasiya Vasitələrinin (KİV) İnkişafına Dövlət Dəstəyi Fondu dövlət yardımı ilə maliyyələşəcək media layihələri üzrə müsabiqə elan edir. Müsabiqəyə layihələr üzrə sənədlərin qəbulu iyulun 1-dən 30-dək aparılacaq.

Lent.az-ın məlumatına görə, fondun rəhbəri Vüqar Səfərli bu gün jurnalistlər üçün keçirdiyi mətbuat konfransında belə deyib. Onun sözlərinə görə, Müşahidə Şurası bir ay ərzində fondun fəaliyyəti üçün hüquqi və təşkilati sənədlərin hazırlanmasını başa çatdırıb.

Vüqar Səfərli qeyd edib ki, 2009-cu ildə fondun büdcəsi 1 milyon 300 min manatdır. Bu vəsaitin 1 milyon 100 min manatı qəzetlərin təqdim edəcəyi layihələrin maliyyələşməsinə, 200 min manatı isə fondun özünün xərclərinə sərf olunacaq. Bu il üçün medianın təqdim edəcəyi layihələr üzrə 11 istiqamət müəyyənləşdirilib. Hər bir media orqanı yalnız 1 layihə təqdim edə bilər.

Onun sözlərinə görə, redaksiyalar müsabiqəyə təqdim edəcəyi layihələrdə büdcənin məbləğini, layihə çərçivəsində hansı işlərin görüləcəyini aydın şəkildə qeyd etməlidir. Hər bir layihənin maliyyə tutumu 20 min manatdan yuxarı olmamalıdır.

Fonda rəhbəri bildirib ki, qaydalara görə, dövlət orqanlarının təsis etdikləri qəzetlər, internet saytları və televiziyalar bu müsabiqədə iştirak edə bilməz.
Təqdim olunacaq layihələrin qiymətləndirilməsi avqust ayı ərzində aparılacaq. Onun sözlərinə görə, bir layihəni 3 ekspert qiymətləndirəcək. Sentyabrın birinci həftəsində isə qaliblər ictimaiyyətə elan olunacaq.

Elxan SALAHOV