BMT-nin ali komissarı bəyanat yaydı

“Qaçqınlar yeknəsəq statistikadan ibarət deyil – onlar mən, sən, o kimi real insanlardır ki, heç bir günahları olmadan hər şeylərindən məhrum olublar”

20 iyun - Ümumdünya Qaçqınlar Günü ərəfəsində BMT-nin qaçqınlar üzrə ali komissarı Antonio Quterreşin bəyanatı yayılıb.

Lent.az-ın məlumatına görə, sənəddə qaçqınların yer üzünün ən həssas vəziyyətdə olan milyonlarla sakindən ibarət olduğu bildirilir. Ali komissar xatırladır ki, qaçqınların hər birinin söylənəcək ağrılı bir hekayəsi var: “Qaçqınlar yeknəsəq statistikadan ibarət deyil – onlar mən, sən, o kimi real insanlardır ki, heç bir günahları olmadan hər şeylərindən məhrum olublar”.

Yeri gəlmişkən, bu gün Bakıda ÜmumDünya Qaçqınlar Gününə həsr olunmuş tədbir keçiriləcək. “Real insanlar, real ehtiyaclar” devizi altında keçiriləcək tədbirdə hökumət rəsmiləri, Azərbaycanda akkreditə olunmuş diplomatik korpusun, beynəlxalq və yerli humanitar təşkilatların təmsilçiləri, qaçqın və məcburi köçkün icmalarının nümayəndələri iştirak edəcəklər.

Hazırda Azərbaycanda 300 min qaçqın, 700 min məcburi köçkün var. Məcburi köçkünlər ölkənin 62 şəhər və rayonunda, 1600-dən çox sıx yaşayış məntəqəsində müvəqqəti məskunlaşıb.

Elxan SALAHOV