Sumqayıtda yararsız duşes istehsal edən sex bağlandı

İqtisadi İnkişaf Nazirliyinin mətbuat xidmətindən Lent.az-a verilən məlumata görə, İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Sumqayıt şəhəri, 16-cı mikrorayon, ev 176A ünvanında Mirağa Mehdiyevə məxsus istehsalat sahəsində aparılan yoxlama zamanı istehsal edilən düşes içkilərinin insan istifadəsi üçün yararsız olması ilə əlaqədar istehsalın dayandırılması və qanunvericiliyin tələblərinə uyğunlaşdırılması barədə icrası məcburi göstəriş verilib.

Məlumata görə, bu istehsalat sahəsində sınaq partiyaları kimi istehsal edilmiş düşes içkisindən dəfələrlə nümunələr götürülərək laborator müayinəyə göndərilib. Laborator müayinələrin nəticələrinə əsasən, düşes içkisinin sınaq partiyalarının da insan istifadəsi üçün yararsız olduğu müəyyən edilib. Nəticədə Mirağa Mehdiyevə düşes içkisi istehsalı üçün verilmiş gigiyenik sertifikat ləğv olunub.