Qarabağ folklorunun problemləri müzakirə ediləcək

Dekabr 26-da Azərbaycan Milli Elmlər Akademiyası Rəyasət Heyətində AMEA Folklor İnstitutunun təşkilatçılığı ilə “Qarabağ folkloru: problemlər, perspektivlər” mövzusunda respublika konfransı keçiriləcək. Akademiyadan Lent.az-a verilən məlumata görə, elmi müəssisənin əməkdaşları cari ildə bölgə sakinlərinin yaşadığı yerlərə ezam olunub, toplanmış folklor nümunələri əsasında ikicildlik kitab hazırlanıb.

Bu iş qarşıdakı illərdə də davam etdiriləcək. Qarabağ bölgəsindən qaçqın düşənlərdən toplanmış folklor nümunələrinin elmi əsaslarla arxivləşdirilməsi, nəşrə hazırlanması ilə yanaşı, onun perspektivlərinin də müəyyənləşdirilməsi nəzərdə tutulub.

Konfransın məqsədi Qarabağ folklorunu, mədəniyyətini öyrənən və araşdıran elm adamlarının bir araya gəlməsini təmin etmək, onların fikirlərini dünya ictimaiyyətinə çatdırmaqdır.