Sosial şəbəkələr mətbuat azadlığını təhdid edir: Nobel mükafatı laureatı

Sosial şəbəkələrin populyarlığının artması təhlükəli təbliğatın inkişafına imkan verir və peşəkar jurnalistləri daim hücum təhlükəsi altında qoyur.

Lent.az-ın xarici mediaya istinadla xəbər verir ki, filippinli jurnalist və Nobel Sülh Mükafatı laureatı Mariya Ressa bu fikirdədir.

Ressa qeyd edib ki, bütün dünyada media işçilərinin vəziyyəti hazırda “qaranlıqdır” və günahın böyük bir hissəsi informasiyanın yayılma üsullarının kəskin dəyişməsindədir.

Onun sözlərinə görə, sosial şəbəkələr təbliğat aparmağı, faktları inkar etməyi, tarixi hadisələri və reallıqları dəyişdirməyi xeyli asanlaşdırıb.

Onun fikrincə, deyəsən, gələn həftə oğul Ferdinand Markosa Filippin prezidenti postunu verəcəklər. Onun diktator atası və adaşıı ölkədə kütləvi quldurluqlara və insan hüquqlarının pozulmasına rəhbərlik edib.

"Belə görünür ki, o, qalib gəlməyə qərarlıdır və bu, yalnız tarix gözümüzün önündə dəyişdiyi üçün mümkündür", - Ressa deyib.

Mariya Ressa

Kiçik Markosun atası ilə əlaqələri onu ölkənin ən mübahisəli siyasətçilərindən birinə çevirib. Lakin o, ata Markosun 20 illik hakimiyyəti zamanı törədilən korrupsiya, sui-qəsdlər və digər sui-istifadələri xatırlamayan, əsasən gənc seçiciləri hədəf alan saxta və aldadıcı sosial media yazılarından istifadə edib.

Ressa, kiçik Markosun Braziliya prezidenti Jair Bolsonaro kimi populist siyasətçilərin ssenarisinə uyğun olaraq debatlarda iştirak etməkdən və jurnalistlərin ənənəvi suallarını cavablandırmaqdan imtina etdiyinə diqqət çəkib.

“Sosial media ilə bağlı problem budur: onlar təbliğatın çiçəklənməsinə, Markos və Bolsonaro kimi ictimai xadimlərə nəzarət və media tarazlığına məhəl qoymamağa icazə veriblər ... və öz reallıqlarını yaradıblar”, - Ressa vurğulayıb.

Onun fikrincə, bu cür çağırışlar qarşısında jurnalistikanın missiyası bu gün həmişəkindən daha vacibdir: “Düşünürəm ki, bu, (jurnalistlərin) nə etməsindən asılı olmayaraq, əhəmiyyət kəsb edən məqamlardan biridir. Eyni zamanda, sənayedə baş verən dramatik texnoloji dəyişiklik jurnalistləri hücum və təhdidlərə qarşı daha həssas edib”.

“Heç bir maneə yoxdur”, - deyən Ressa çox vaxt qəzəb və nifrət dolu müzakirələri alovlandıran alqoritmlərə əsaslanan sosial medianın əsasən qanunsuz dünyasına da işarə edir.

“Hər dəfə mürəkkəb bir hekayə hazırlayanda, səlahiyyətliləri məsuliyyətə cəlb etməyə çalışarkən, şəxsi hücuma hazır olmalısınız”, - Ressa bildirib.