İsmayıl Ömərovun yerinə 3 nəfər namizədliyini verib

İctimai Televiziya və Radio Yayımları Şirkətinin baş direktoru vəzifəsini tutmaq üçün elan olunan müsabiqəyə 3 nəfər sənəd verib

İctimai Televiziya və Radio Yayımları Şurası İctimai Televiziya və Radio Yayımları Şirkətinin baş direktoru İsmayıl Ömərovun səlahiyyət müddəti başa çatdığına görə bu vəzifəni tutmaq üçün martın 31-dən aprelin 7-dək müsabiqə elan edib. Yayım Şurasının rəhbəri Cahangir Məmmədlinin APA-ya verdiyi məlumata görə, sənəd qəbulunun müddəti səkkiz gündür. Sənədlər istirahət günündən başqa hər gün saat 10.00-dan 18.00-dək İTV-nin binasında qəbul edilir. C. Məmmədli deyib ki, hələlik müsabiqəyə 3 nəfər namizəd sənəd təqdim edib: “Mən elə hesab edirəm ki, bu dəfə keçirilən müsabiqə 2005-ci ildəki qədər gərgin keçməyəcək. Çünki artıq Yayım Şurasının bu sahədə təcrübəsi var. Keçən müsabiqədə teleradio jurnalisti olmayan çoxlu sayda insan iştirak etmişdi. Ona görə də bu dəfə əsas tələb kimi iştirakçıların teleradio sahəsində təcrübəsinin olması götürülür. Mənə elə gəlir ki, müsabiqədə heç bir problem olmayacaq, müsabiqəyə ən məsuliyyətli şəxslər qatılacaq”.

Yayım Şurasının sədri deyib ki, hələlik İTV-nin baş direktoru İsmayıl Ömərov müsabiqəyə namizədliyini təqdim etməyib: “Qanuna əsasən, hazırkı baş direktor yenidən bu vəzifəni tutmaq üçün namizədliyini verə və bu vəzifəyə seçilə bilər. Lakin mən bilmirəm ki, İsmayıl Ömərovun öz arzusu necə olacaq, namizədliyini irəli sürəcək ya yox. Yəqin ki, bu, 2-3 günə məlum olacaq”.

Qeyd edək ki, müsabiqədə iştirak etmək arzusunda olanlar Yayım Şurası sədrinin adına ərizə, şəxsiyyət vəsiqəsinin surəti, ali təhsil haqqında diplomun notariusda təsdiq olunmuş surəti, əmək kitabçasından çıxarış, tərcümeyi-hal və 3-4 ölçüdə 2 ədəd foto-şəkil təqdim etməlidirlər.