Azərbaycandakı 3 erməni hərbçi-əsir üçüncü ölkəyə getmək istəyir

Hazırda onların bununla bağlı müraciətinə baxılır

Bu il fevralın 27-dən 28-ə keçən gecə Ağcabədi rayonu Munaxorlu kəndi istiqamətində, qoşunların təmas xəttinə yaxın ərazidə mülki əhali tərəfindən saxlanılaraq, Azərbaycan hərbçilərinə təhvil verilən Ermənistan Ordusunun üç əsgəri – Qrant Markosyan, Alik Tevosyan və Artur Sarkisyan üçüncü ölkəyə keçmək üçün müraciət ediblər.

Bu barədə APA-ya Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi Şahin Sailov bildirib. Ş. Sayılovun sözlərinə görə, hazırda onların müraciətinə baxılması istiqamətində iş aparılır: “Erməni hərbçilər artıq BMT-nin Azərbaycandakı nümayəndəliyinə müraciət ediblər. Müraciətə nə vaxt baxılacağı isə hələlik məlum deyil. Bu, uzun sürən prosesdir. Bundan əvvəlki erməni hərbçisinin üçüncü ölkəyə göndərilməsi prosesi 8-9 ay çəkdi”.

Qeyd edək ki, Qrant Markosyan, Alik Tevosyan və Artur Sarkisyan fevralın 28-nə keçən gecə təmas xəttinin Azərbaycan Silahlı Qüvvələrinin nəzarətinə olan hissəsinə keçib. Erməni əsgərlər bu addımlarını ordunun baxımsız vəziyyətə olması, hətta yeməyə çörək tapmamaları ilə izah ediblər.