Nəfəsinizi kəsəcək ən yaxşı həyəcan filmləri

Gərginliyi titrlərə qədər saxlayan bir film axtarırsınız? Elə isə Netflix-in triller janrında olan filmləri bu gün izləməyə dəyər. Bu, hadisələrin sürətlə inkişaf etdiyi və hər süjet dönüşünün nəfəsinizi tutmağa vadar etdiyi bir janrdır.

Bəzi hekayələr insanın xilası və ya hakimiyyət uğrunda nə qədər uzağa gedə biləcəyini düşündürür. Digərləri isə sadəliyin arxasında gizlənən dəhşətli həqiqətləri üzə çıxarır.

Lent.az ekrandan gözünüzü ayıra bilməyəcəyiniz 3 filmi təqdim edir. Bu filmlər triller sevərləri heyran qoyacaq və sevimlilərinizin siyahısına düşəcək.

“Yaxşı tibb qardaşı” (2022)

Baş qəhrəman Əmi Lofren (Cessika Çasteyn) - tək ana və reanimasiyada çalışan tibb bacısıdır. O, ürək xəstəliyindən əziyyət çəksə də, sağlamlıq sığortası almaq və işini qorumaq üçün bunu gizlədir. Əmi yeni iş yoldaşı – tibb qardaşı Çarlz Kallen (Eddi Redmeyn) ilə tez dostlaşır. Çarlz ona xəstəliyi ilə mübarizədə yardım edir. Amma xəstəxanada bir-birinin ardınca baş verən müəmmalı ölüm hallarından sonra Əmi, Çarlzdan şübhələnməyə başlayır. Polis araşdırmaya başlayanda, o, detektiv Deni ilə əməkdaşlıq edir.

Nəticədə məlum olur ki, Çarlz Kallen – 29 nəfərin ölümündə təqsirli bilinən bir seriyalı qatildir (gerçəkdə qurbanlarının sayı daha çox ola bilər).

“Şeytan həmişə buradadır” (2020)

Bu film bir neçə nəslin taleyindən bəhs edir, fonunda isə dini fanatizm, zorakılıq və əxlaqi çöküş dayanır. Hadisələr İkinci Dünya Müharibəsindən sonra Ohayo ştatındakı kiçik bir şəhərdə baş verir.

Baş qəhrəman - Arvin Rassel (Tom Holland) - yaxınlarını qorumağa çalışan bir gəncdir. Onun atası Uillard (Bill Skarsgard), müharibədən qayıtdıqdan sonra həyat yoldaşı Şarlottanı (Heyli Bennet) ölümcül xəstəlikdən xilas etmək üçün ifrat üsullara əl atır.

Paralel olaraq digər hekayələr də açılır: din xadimi Prestin dini gücünü manipulyasiya üçün istifadə edir, Karl və Sendi Henderson adlı qatil cütlük seriyalı qətllər törədir, şerif Li Bodiker səlahiyyətlərindən sui-istifadə edir.

Bu obrazların hər biri Arvinin həyatına təsir göstərir və onu çətin, həyatını dəyişəcək qərarlar verməyə vadar edir.

“Platforma” (2019)

Bu, qorxu və fantastika elementləri ilə zəngin bir İspan trilleridir. Hadisələr ortasında nəhəng bir şaquli dəlik olan çoxmərtəbəli bir həbsxanada baş verir. Hər mərtəbədə iki məhbus yerləşir. Hər gün binanın mərkəzindən keçən bir platformada yemək yuxarıdan aşağıya doğru hərəkət edir və hər mərtəbədə bir neçə dəqiqə dayanır.

Üst mərtəbədə olanlar yeməklə dolu masadan istifadə edə bilir, aşağıdakılara isə qalıqlar düşür, bəzən isə heç nə çatmır.

Hər ay məhbuslar təsadüfi mərtəbələrə keçirilir, bu da onların sağ qalma şanslarını dəyişir. Baş qəhrəman Qorenq bu sistemdə dəyişiklik etməyə çalışır.