“Sülh qoruyucusu” Yaşıl teatrda konsert verəcək - FOTO

Lent.az-ın məlumatına görə, konsert “Buta” İncəsənət Mərkəzinin təşkilati dəstəyi ilə baş tutacaq. Tamara Qverdtsiteli Bakıdakı konserti haqqında deyib: “Son 10 ildə Bakıda konsert verməmişəm. İyulun 2-də gözəl konsert zalında böyük dəyər verdiyim, incə musiqi duyumuna malik və istiqanlı Azərbaycan tamaşaçıları ilə görüşmək mənim üçün böyük şərəfdir”.

Tamara Qverdtsiteli - müğənni və bəstəkar, Gürcüstan və Rusiyanın xalq artistidir. O, dünyanın bir nömrəli konsert zallarında – Karnegi - Holl, Akadem-Holl və Paris Olimpiya zalında solo konsertlər verir.

Tamara Qverdtsitelinin bioqrafiyasında əfsanəvi bəstəkar Mişel Leqran böyük yer tutur, o, Qverdtsitelinin ifasına elə məftun olub ki, xüsusi olaraq onun üçün bir neçə mahnı bəstələyib və konsertdən sonra Parislilərə üzünü tutaraq: “Paris, bu adı unutma – Tamara!” deyib. Onlar ilk birgə konserti Paris Olimpiyasında veriblər. Müğənni gürcü, rus, ispan, ingilis, fransız, italyan, alman, ukrayna və yəhudi dillərində mahnılar ifa edir.

Məşhur sənətçi Tbilisi Konservatoriyasını bitirib. O, bir çox beynəlxalq musiqi müsabiqələrinin qalibi və çox sayda nüfuzlu mükafatların laureatıdır. Xanım Qverdtsiteli “Sülh qoruyucusu” mükafatının laureatıdır, eyni zamanda “Fəxri mesenat və xeyriyyəçi” adına, “Mərhəmət və səmimiyyətə görə” mükafatına layiq görülüb.

Lalə Yusifqızı