Barış Mançonun mahnılarının müəllifi ölüb

Türkiyənin məşhur bəstəçisi, "Kurtalan Ekspres" musiqi qrupunun gitaraçısı Bahadır Akkuzu infarkt keçirib.

Lent.az-ın Türkiyə mətbuatına istinadən yaydığı məlumata görə, dünən axşam özünü pis hiss edən musiqiçi oğlu Sonat Akkuzu tərəfindən xəstəxanaya çatdırlıb.

Bahadır Akkuzu sinəsində və qolundakı ağrıdan şikayətlənib. Həkimlər onu müayinə ediblər. Ancaq rentgen müayinəsi zamanı Bahadır Akkuzu qəfil huşunu itirib.

İnfarkt keçirən 54 yaşlı musiqiçini həyata qaytarmaq üçün 1 saat çalışsalar da, bir nəticə hasil olmayıb, o, xəstəxanada keçinib.

Qeyd edək ki, 15 yaşından səhnəyə çıxmağa başlayan Akkuzu ilk dəfə "4 Adam" adlı qrup qurub. 1978-ci ildən "Kurtalan Ekspres" qrupunun gitaraçısı, vokalisti və qurucusudur.

Musiqi həyatı dövründə Barış Manço, Cem Karaca, Erkin Koray, Edip Akbayram kimi sənətkarlarla çalışıb. Akkuzunun "Sakız xanımla Mahur Bəy", "Qara toprak, ver yarımı" və "Al məni" adlı bəstələri Barış Manço tərəfindən oxunub.