VII “START” Tələbə və Gənclərin Beynəlxalq Film Festivalının açılışı oldu

Lent.az-ın məlumatına görə, tədbirdə çıxış edən Mədəniyyət və Turizm Nazirliyinin kinematoqrafiya şöbəsinin sektor müdiri Yusif Şeyxov artıq 7-ci ildir keçirilən festivalı yüksək qiymətləndirib. Bu festival sayəsində yaradıcı gənclərin üzə çıxdığını vurğulayan Y. Şeyxov bildirib ki, gənclər tərəfindən 5 ildə 23 bədii qısametrajlı film çəkilib. O, ildən-ilə miqyasını genişləndirən bu festivala daha çox ölkələrin qatılacağına ümidvar olduğunu deyib.

“7 il öncə bu festivalın layihəsini təqdim edəndə inanmazdım ki, nə vaxtsa burada 16 ölkə iştirak edəcək. Bu, məni çox sevindirir. Arzu edirəm ki, festival illər sonra 96 ölkəni özündə birləşdirəcək”, - deyə sözə başlayan festivalın direktoru Fehruz Şamıyev festivalın əsas məqsədinin professional və istedadlı gəncləri ortaya çıxarmaq olduğunu qeyd edib. F. Şamıyev bu festivalı həm də mübadilə proqramı və kino bayramı adlandırıb.

Açılış mərasimi musiqili proqramla davam edib. Mərasimdə “Oyan” (Azərbaycan), “Burda mənəm” (Polşa) və “Tortik” (Ukrayna) filmləri nümayiş olunub.

Qeyd edək ki, Mədəniyyət və Turizm, Gənclər və İdman nazirliklərinin və “CİNEMA” Mərkəzinin təşkilatçılığı ilə həyata keçirilən festivalın münsiflər heyətinə Yavər Rzayev sədrlik edir. Jürinin üzvləri Aygün Aslanlı (Azərbaycan), Rodion İsmayılov (Rusiya), Nadir Saivən (İran) və David Caniledzedir (Gürcüstan).

Noyabrın 23-ü və 24-də də davam edəcək kinoforumda 16 ölkədən 100-ə yaxın müxtəlif janrlı film nümayiş olunacağı gözlənilir. Filmlərin nümayişi saat 11:00-dan 18:00-a qədər Azərbaycan Kinematoqrafçılar ittifaqında olacaq.

Xatırladaq ki, “START” Beynəlxalq Film Festivalını 2004-cü ildə “Cinema” Gənc Kinematoqrafçılar Mərkəzi təsis edib. Azərbaycanın ilk peşəkar rejissoru Səməd Mərdanovun adını daşıyan festival növbəti illərdə digər ölkələrin tələbələrini də özünə cəlb etməklə əhatə dairəsini daha da genişləndirib. “START” Beynəlxalq Film Festivalının təşkilatçı və təsisçilərinin məqsədi regionda gənclərin ən mötəbər film festivalının məhz Azərbaycanda keçirilməsinə nail olmaqdır. 2005-ci ildən beynəlxalq statusu qazanan “START”, həm də yerli gənc rejissorların əcnəbi həmkarları ilə əlaqələr qurmasında start nöqtəsidir.

Qeyd edək ki, VII “START” Tələbə və Gənclərin Beynəlxalq Film Festivalının informasiya dəstəyi APA İnformasiya Agentliyinə məxsusdur.

Xəyalə