Aygün Bayramova: “Mən elə söz deməmişəm”

Bunu Lent.az-a Akademik Opera və Balet Teatrının solisti, xalq artisti Aygün Bayramova deyib. Onun sözlərinə görə, “ATV maqazin”də yayımlandığı kimi, “toya 15 dəqiqəsi 7 min manata gedirəm” ifadəsini işlətməyib: “Məndən soruşdular ki, “7 minə toya getmisiz?” Dedim getmişəm. Sonra soruşdular “bütöv toya?”. Mən də dedim ki, ümumiyyətlə bütöv toyu çox nadir hallarda oxuyuram. Adətən yarım saatlığa, bəzən 15 dəqiqəlik gedirəm. Mən sözümün ağasıyam. Nə dediyimi bilirəm. Amma mən “toyun 15 dəqiqəsini 7 minə gedirəm” sözünü deməmişəm”.

Aygün Bayramova səslənən qiymətin Azərbaycan üçün inandırıcı olmadığını da bildirib: “Normal adam anlayır ki, bu qiymət Azərbaycan reallığına uyğun deyil. Mən inanmıram, bizdə bir müğənniyə toyda 15 dəqiqə oxuması üçün 7 min manat verələr. Yenə deyirəm ki, mən elə söz deməmişəm. Dediklərimi istədikləri şəkildə montaj edib özlərinə sərf edən formada göstəriblər. Ona görə də özümə söz vermişəm ki, bir də onların suallarını cavablandırmayacam”.

Xəyalə