“20 yanvar abidə-kompleksi”nin tikintisi başa çatdı

Bakının “20 yanvar” dairəsində 1990-cı ilin 20 yanvar faciəsi qurbanlarını xatirəsinə həsr olunmuş kompleksin qurulması işləri başa çatıb. Ərazidə yaşayanların Lent.az-a verdiyi məlumata görə, tamamlama işləri artıq yekunlaşıb və bu gün komleksin ətrafı təmizlənib: “Yalnız əsas abidənin üzərinə örtük çəkilib”.

Azərbaycan prezidentilə razılaşdırılan və Yasamal rayon İcra Hakimiyyətinin başçısı İbrahim Mehdiyevin sərəncamı ilə qurulan “20 yanvar abidə-kompleksi”nin bu il yanvarın 20-də açılışı olacağı gözlənilir.

Kompleksin tikintisinə 2009-cu ilin oktyabrından başlanılmışdı.

Qeyd edək ki, bu il 20 yanvar faciəsinin 20-ci ildönümüdür. 1990-cı il yanvarın 19-dan 20-nə keçən gecə SSRİ Silahlı Qüvvələrinin bölmələri Azərbaycanda milli-azadlıq hərəkatını yatırmaq üçün Bakıda qırğın törədiblər. 130 nəfərdən çox dinc sakin öldürülüb, yüzlərlə insan yaralanıb. Həmin vaxt şəhid olanların əksəriyyəti Şəhidlər Xiyabanında dəfn edilib.

Pərvin ABBASOV