Dilarə Əliyeva: “Onun Flora Kərimova barəsində belə danışmaq hüququ yoxdur”

“Atv” telekanalında yayımlanan “Çal-Çağır” verilişinin son buraxılışı tamaşaçılar tərəfindən birmənalı qarşılanmayıb. Lent.azın redaksiyasına zəng vuran sadə vətəndaşlar verilişdə “Şərq” qəzetinin əməkdaşı ilə xalq artisti Flora Kərimova arasında baş verən insidentə kəskin münasibət bildiriblər.
Verilişin aparıcısı Dilarə Əliyeva lent.az-a açıqlamasında öz münasibətini və mövqeyini açıqlayıb: “Qarşı tərəf Flora Kərimovanın xalq artisti adına layiq olmadığını “Şərq” qəzetinin müxbiri kimi iddia edir. Mən bütün sadə insanların adından müəyyən etirazlarımı ona çatdırdım. Ekspert Zeynal Məmmədli bu barədə öz fikrini irəli sürdü.
Mən sadəcə baş verən hadisənin mənzərəsini təqdim etdim. Bu, peşə vəzifəmdir. Bu adam yazır, keyfiyyətli, yoxsa keyfiyyətsiz qəzetdə işləyir deyə bilmərəm. Amma belə bir qəzet var. Yazır, jurnalistdir, iddia edir ki, Flora Kərimova xalq artisti adına layiq deyil. Biz jurnalist kimi bu fikri onun irəli sürə bilmək hüququ olmadığını dedik”.
Dilarə Əliyeva hadisəyə şəxsi mövqeyni də açıqlayıb: “Bir sadə azərbaycan vətəndaşı kimi deyə bilərəm ki, Flora Kərimova barəsində belə danışmaq hüququ yoxdur. Bu fikri teleaparıcı kimi də deyə bilərəm. Biz bu veriliş onları dəvət etməklə bütün jurnalistlərin səviyyəsini aşağı salmaq fikrində deyilik. Sadəcə reallığı göstəririk”.
Dilarə Əliyeva eksklüziv olaraq lent.az-a verilişdən sonra hər iki tərəfin bir-biri ilə öpüşüb barışdığını bildirib.

Lalə Yusifqızı