Bu ölkənin yeganə "qanuni oğru"su saxlanıldı

Tatarıstandan olan yeganə “qanuni oğru”, kriminal dairələrdə Roma Kazanski kimi tanınan Roman Sıçev bu gün Kazanda saxlanılıb.

Lent.az Rusiya mediasına istinadla bildirir ki, bu səhər Sıçev 15 il əvvəl baş vermiş qətllə bağlı cinayət işi üzrə şahid qismində dindirilmək üçün Tatarıstan Respublikası İstintaq Komitəsinin binasına gəlib. Lakin müstəntiqin kabinetində onu dələduzluq və hədə-qorxu ilə tələb etməkdə şübhəli bilinməkdə ittiham ediblər.

Təhlükəsizlik işçiləri bu cinayətləri 2024-cü ilə aid edirlər. Hazırda müstəntiqlər Tatarıstan Respublikası Daxili İşlər Nazirliyinin cinayət axtarış idarəsinin mütəşəkkil cinayətkarlıqla mübarizə şöbəsinin əməliyyatçıları ilə birlikdə onun ətrafında əməliyyat tədbirləri həyata keçirirlər.

Qeyd olunur ki, Sıçev 37 yaşında "tac alıb". Onun "tacqoyma mərasimində" Sergey Stokozub (Serega Samarsky), Konstantin Borisov (Kostyl) və digər “qanuni oğru”ların da iştirak etdiyi bildirilir.

Sıçevin "tacqoyma mərasimini" Oleq Muxametşin (bu yaxınlarda statusundan imtina etmiş Muxa), Viktor Panyuşin (Pan) və nüfuzlu Oleq Medvedev (həmçinin Şişkan kimi tanınan Şişkanov) dəstəkləyib.

Şişkan ən nüfuzlu slavyan “qanuni oğru”larından biri, “cinayətkar aləmin kralı” Şakro Molodoyun (Zaxariy Kalaşov) varisi hesab olunur. 2024-cü ilin iyununda o, mütəşəkkil cinayətkar qrup təşkil etmək, banditizm və qətl törətməkdə ittiham olunaraq ömürlük həbs cəzası alıb.

Sıçev bir neçə dəfə məhkum olunub. Sonuncu məhkumluq cəzasını narkotikə görə alıb. O, cəzasını Tatarıstanda, İK-2-də çəkib, oradan 2021-ci ildə azad edilib.