İpoteka kreditləşməsində 35 yaş müəmması
27 iyun 2009 12:30 (UTC +04:00)

İpoteka kreditləşməsində 35 yaş müəmması

Müvəkkil banklar sosial ipotekada birgə borcalanların hamısının yaşının 35-dən aşağı olmasını vacib sayır, fond isə bunu təkzib edir

Dövlət vəsaiti hesabına ipoteka kreditlərinin alınması üçün müraciətlərin sayı artır. Bu günədək müvəkkil kredit təşkilatları tərəfindən ipoteka krediti almaq məqsədilə müraciət etmiş 500-dən artıq vətəndaşın rəsmi ərizələri qəbul edilib.

Azərbaycan İpoteka Fondundan Lent.az-a bildiriblər ki, daxil olmuş müraciətlər üzrə kredit məbləğlərinin ümumi həcmi 22 milyon manatdan çoxdur. İyunun 16-dan start götürmüş güzəştli ipoteka kreditləri almaq istəyən şəxslərdən 28 müraciət qəbul edilib. Həmin şəxslərin almaq istədiyi ipoteka kreditlərinin ümumi məbləği 1 milyon manata yaxındır.

Yeri gəlmişkən, güzəştli şərtlər əsasında ipoteka krediti almaq istəyənlərlə bağlı bir sıra hüquqi problemlər ortaya çıxıb. Belə ki, müvəkkil banklarda iddia edirlər ki, güzəştli şərtlər əsasında borcalan qismində iştirak edən ailə üzlərindən heç birinin yaşı 35-i ötməməlidir. Əks halda, onlar güzəştli şərtlər əsasında ipoteka krediti almaq hüququna malik deyil. Bu isə o deməkdir ki, ailə üzvlərindən birinin yaşı 35-ə çatmayıbsa, digərinin yaşı isə bu həddi keçibsə, həmin gənc ailə birgə borcalan qismində iştirak edə bilməz. Bundan başqa, imtiyazlı ailələrin subay üzvlərinin də güzəştli şərtlərlə ipoteka krediti almaq hüququ yoxdur.

Azərbaycan İpoteka Fondunda isə müvəkkil bankların borcalanlar arasında bu cür şərt qoymaq ixtiyarı yoxdur. Fondda bildirirlər ki, gənc ailənin bir üzvünün yaşı 35-i keçməyisə, o ailənin adından borcalan qismində iştirak edə bilər və bu, güzəştli şərtlərlə ipoteka kreditlərinin alınması üçün yetərlidir. Həmçinin güzəştli kateqoriyaya aid edilən ailələrin subay üzvləri də həm birgə, həm də ayrılıqda borcalan qismində çıxış edə bilər.

Elxan SALAHOV
# 2450

Oxşar yazılar