Jirinovskinin mühafizəçisi Qazzayevin burnunu sındırıb

“Xeyirxahlıq bayrağı altında” keçirilən xeyriyyə matçında Ukraynanın Kiyev “Dinamo”sunun baş məşqçisi Valeri Qazzayevin burnunu sındırıblar.

Lent.az-ın məlumatına görə, bu haqda onu müalicə edən həkim Yuri Vasilkov “Sport” telekanalına açıqlama verib.

Vasilkov bildirib ki, Qazzayev məşqçilər və “Starko-Rusiç” komandaları arasında keçirilmiş matçda iştirak edib. Osetiyalı mütəxəssis matçın sonunadək oynaya bilməyib. Görüşdə iki dəfə - dizindən və burnundan zədə alan “Dinamo”nun baş məşqçisi əvəzlənməli olub. Diz zədəsi ciddi olmasa da, burnundan aldığı xəsarət Qazzayevin əlavə tibbi müdaxiləsi zərurəti yaradıb.

55 yaşlı mütəxəssis Rusiya Liberal Demokrat Partiyasının lideri Vladimir Jirinovskinin mühafizə xidmətinin sabiq rəisi Oleq Malışkinlə toqquşma nəticəsində zədələnib. Xeyriyyə matçı isə məşqçilərdən ibarət komandanın 5:3 hesablı qələbəsi ilə başa çatıb.

Qalib komandanın heyətində Qazayev, Rusiya yığmasının məşqçiləri Aleksandr Borodyuk və İqor Korneyev hərəyə bir dəfə fərqləniblər. Georgi Yartsev isə “dubl” edib. “Starko-Rusiç”in qollarını isə İlya Averbux (2) və Pyer Nartsiss vurub.