Səmtləşmə idmanı üzrə Azərbaycan çempionatı keçirilib

“ARDNŞ-in “Azərikimya” İstehsalat Birliyinin gənc idmançıları Nabranda səmtləşmə idman növü üzrə iki gün davam etmiş Açıq Respublika Çempionatında ilk dəfə iştirak ediblər.

Lent.az-ın ARDNŞ-in rəsmi saytına istinadən verdiyi məlumata görə, 20 illik fasilədən sonra ilk dəfə keçirilən çempionatda respublikanın 30-a yaxın idarə və müəssisəsinin, nazirlik və silahlı qüvvələrin komandaları iştirak edib.

Yarışların təntənəli açılış mərasimində Azərbaycanın Səmti Müəyyənetmə İdmanı Federasiyasının prezidenti Mirəli Kazımov, Federasiyanın Rəyasət heyətinin üzvü, Ukraynanın Azərbaycandakı səfiri Aleksandr Mişenko və digər çıxışçılar idmançılara uğurlar arzulayıb. Çempionat həm komandalar arasında, həm də fərdi birincilik prinsipi üzrə keçirilib. Baş verə biləcək fövqəladə hadisələr zamanı qarşıya çıxa biləcək maneələri müxtəlif yollar və vasitələrlə dəf etmək bacarığı, çətin və mürəkkəb şəraitdə vəziyyətdən qısa bir vaxtda, çevikliklə və təhlükəsiz çıxma keyfiyyətləri aşılayan bu yarışlar Nabranın çətin relyefli sahələrində davam edib. “Azərikimya” İctimai Birliyinin idmançıları əsasən peşəkarların qoşulduğu yarışlarda yaxşı nəticələr göstəriblər. 60-dan artıq qadının qüvvələrini sınadığı fərdi yarışlarda “Azərikimya”-nın əməkdaşı Amalya Seyidova 9-cu, Sədaqət Abdulova 11-ci, Səbinə Batmanova isə 14-cü yerləri tutublar. 130-dan artıq kişi idmançının fərdi yarışında isə “Azərikimya”-nın əməkçisi Ramil Şabanov 29-cu yerə layiq görülüb.