Pişiyiniz yatmağınıza mane olarsa, nə etməli? Baytarların TÖVSİYƏLƏRİ

Pişiklər bəzən sağlamlıq üçün vacib olan yuxunu poza bilər – oynayaraq, yemək istəyərək və ya sadəcə diqqət tələb edərək.

Gecə yuxusu sağlamlıq üçün son dərəcə vacibdir. Lakin bir çox ev heyvanı sahibi pişiklərinin yuxunu pozmasından şikayət edir - onlar yataqda oynayır, yemək istəyir və ya sadəcə sahiblərinin diqqətini çəkməyə çalışırlar.

SprucePets portalının mütəxəssisləri bunun səbəblərini və həm özünüzün, həm də pişiyinizin rejimini necə qaydaya salacağınızı izah ediblər.

Lent.az bu tövsiyələri sizə təqdim edir:

Niyə pişik sizi gecə oyadır?

Pişiklər təbiətcə gecə aktiv olan canlılardır. Gün ərzində dincəlir, gecə isə oynaya, ov edə və ya sadəcə aktiv ola bilərlər. Gecə davranışlarının əsas səbəbləri bunlardır:

Gündüz kifayət qədər oyun və aktivliyin olmaması;

Tənhalıq - ev heyvanı çox vaxt tək qalırsa;

Gecə aclıq və ya susuzluq hissi;

Sahiblə bioloji ritmlərin uyğun gəlməməsi;

Mühitin dəyişməsi - məsələn, tualetin və ya yatağın yerinin dəyişdirilməsi. Əgər pişiyinizin bu davranışı qəfil başlayıbsa və əvvəllər olmayıbsa, baytar müayinəsi vacibdir. Bu, diş problemləri, artrit, şəkərli diabet və ya qalxanabənzər vəzinin pozğunluğu kimi xəstəliklərin əlaməti ola bilər.

Pişiyin gecə sizi oyatmamağına necə öyrəşdirmək olar?

Baytarlar aşağıdakı təsirli üsulları məsləhət görür:

Yatmazdan əvvəl oyun

Gecə yatmazdan bir saat əvvəl pişiyinizlə aktiv oynayın, sonra isə ona yüngül qəlyanaltı verin. Bu, pişiyin yuxuya köklənməsinə kömək edəcək.

Yataq otağına girişi qadağan edin

Əgər pişik yuxunuza mane olursa, onun yataq otağına girişini tamamilə qadağan edin. Onun üçün ayrıca, rahat bir yer hazırlayın – su və tualetə çıxış imkanı ilə.

İkinci pişik

Əgər pişiyiniz siz evdə olmadıqda darıxırsa, ona yoldaş pişik almağı düşünə bilərsiniz. Bu, gecə diqqət çəkmə cəhdlərini azalda bilər. Oyandıqdan dərhal sonra yemək verməyin. Əgər pişik sizi oyadandan sonra yemək alırsa, bunu uğur kimi yadda saxlayacaq.

Belə davranışı təşviq etməməyə çalışın. Qidalanma, oyun və ünsiyyət üçün sabit vaxtların olması pişiyin özünü daha rahat hiss etməsinə və gecə sizi az narahat etməsinə kömək edir.

Əlavə tövsiyələr

Yataq otağının qapısını bağlayın. İlk günlər pişik etiraz edə bilər, lakin zamanla öyrəşəcək. Sakitləşdirici səslərdən istifadə edin. Məsələn, su, meşə və ya yağış səsləri. Otağı tam qaranlıq edin. Bu, pişiyin sizin hərəkətlərinizə ov kimi yanaşmasının qarşısını alar. Doğru yanaşma və bir qədər səbir sayəsində sakit gecələrə qayıtmaq və tüklü dostunuzla harmoniyada yaşamaq mümkündür.

Heyvanlar Heyvanlar aləmi Pişiklər niyə yatmağa qoymur