Qaxda meşə massivi yanır

Bu gün axşam saatlarından başlayaraq Qax rayonunda yerləşən Ulubaş dağının meşə massivi yanmağa başlayıb.
Lent.az-ın anspress.com-a istinadən verdiyi məlumata görə, yanğının tüstüsü rayonun demək olar ki, bütün ərazisindən görsənir. Rayon sakini Saleh Şirinovun sözlərinə görə, yanğını söndürmək üçün şəxsi avtomobili olanlar o səmtə yola çıxırlar.

Qax rayon polis şöbəsinin baş leytenantı Nemət Rəşidov isə deyib ki, yanğın otlaq sahəsində qeydə alınıb.

Yanğını söndürmək üçün Fövqəladə Hallar Nazirliyinin Dövlət Yanğından Mühafizə Xidmətinin əməkdaşları hadisə yerinə yollanıblar.