Əsgərimiz iki yoldaşını güllələdi - YENİLƏNİB

Erməni silahlı birləşmələri aprelin 17-də də atəşkəsi pozmaqda davam edib. Hərbi mənbələrdən Lent.az-a verilən məlumata görə, Qarabağ cəbhəsində atəşkəsin pozulması nəticəsində Milli Ordunun əsgəri 1994-cü il təvəllüdlü Hətəmov Elşad Əli oğlu yaralanıb. Güllə yarası almış əsgər hərbi hospitala yerləşdirilib. Yaralanmış əsgərimiz Səfərbərlik və Hərbi Xidmətə Çağırış üzrə Dövlət Xidmətinin Abşeron rayon Şöbəsindən həqiqi hərbi xidmətə çağırılıb.

APA-nın məlumatına görə, hadisə Müdafiə Nazirliyinin Ağdamda yerləşən “N” saylı hərbi hissəsində baş verib. Əsgər Səbuhi Osmanlının tabeliyindəki avtomat silahdan açılan atəş onun hərbçi yoldaşları - 1994-cü il təvəllüdlü Elşad Hətəmov və Mövlud Murtuzəliyevə dəyib. Nəticədə güllə yarası alan hər iki əsgər hospitala yerləşdirilib. İlkin məlumata görə, hadisə əsgərin silahla ehtiyatsız davranması nəticəsində baş verib.

Qeyd edək ki, ilkin məlumatda əsgərimizin düşmən gülləsindən yaralandığı bildirilmişdi.