Azərbaycan millisinin sabiq baş məşqçiləri üçün yubiley

Futbol üzrə Topaz Premyer Liqasının XI turu Azərbaycan milli komandasının sabiq baş məşqçiləri Vaqif Sadıqovla Şahin Diniyev üçün əlamətdar olub. Lent.az-ın məlumatına görə, Peşəkar Futbol Liqasının hazırladığı statistik yazıda Sadıqovun AZAL-ın baş məşqçisi qismində 50-ci matçına çıxdığı qeyd olunub.

Son turun paytaxt derbisində “İnter”ə 0:2 hesabı ilə uduzan təcrübəli mütəxəssis 50 matçda 22 qələbə, 15 heç-heçə və 13 məğlubiyyət alıb. Sadıqovun rəhbərliyi altında 73 qol vuran AZAL üçün “İnter”lə görüşdə buraxılan ilk top 50-ci olub.

mövsüm	turnir	o	q	h	m	t	x
2011/12	Premyer Liqa	6	2	3	1	5-3	9
2012/13	Premyer Liqa	32	16	9	7	57-32	57
2012/13	Kubok	1	0	0	1	0-1	0
2013/14	Premyer Liqa	11	4	3	4	11-15	15
Cəmi:		50	22	15	13	73-51	81

Diniyev isə “Rəvan”ın sükanı arxasında ilk xalını qazanmaqla bərabər, Azərbaycan çempionatlarında baş məşqçi kimi 100-cü yubiley matçına çıxıb. “Bakı” ilə oyundakı qolsuz heç-heçəyə qədər 99 oyunda bu postda olan mütəxəssis “100”ə 3-cü klubunda çatıb. “Rəvan”a qədər “Qarabağ” və “Kəpəz”ə başçılıq edən Diniyev bu klublar müvafiq olaraq “Qarabağ-Azərsun” və “Gəncə” adlandığı vaxt onların sükanı arxasında olub. Premyer Liqada 50-ci qələbənin astanasında olan Diniyevin hesabında 49 qələbə, 21 heç-heçə və 30 məğlubiyyət var. O, Azərbaycan çempionatları tarixində 100 və daha çox oyunda baş məşqçi olan 21-ci mütəxəssis kimi tarixə düşüb.

Qarabağ-Azərsun (Ağdam)	2001/02	25	13	2	10	41-34	41
Qarabağ-Azərsun (Ağdam)	2003/04	26	19	3	4	63-17	60
Gəncə	2004/05	34	11	9	14	37-37	42
Gəncə	2005/06	13	6	6	1	22-8	24
Rəvan	2013/14	2	0	1	1	1-2	1
Cəmi:		100	49	21	30	164-98	168

Topaz Premyer Liqasının XI turu çempionatın ən gənc komandaları “Rəvan”la “Sumqayıt” üçün də əlamətdar olub. Mövsümün autsayderləri 3-cü dəfə çıxış etdikləri Premyer Liqada yubiley - 75-ci matçlarında iştirak ediblər. Lakin nə “Rəvan”, nə də “Sumqayıt” yubiley oyununda qol vurmağa nail olub. Paytaxt təmsilçisi “Bakı” ilə qolsuz heç-heçə etməklə 1 xal qazana bilib. Sumqayıtlılar isə “Qəbələ”yə 0:2 hesabı ilə uduzub.