Səlim Müslümovun məhkəməsində baş həkimə İRAD:  "Kimdənsə qorxursuz?"
26 sentyabr 2022 18:27 (UTC +04:00)

Səlim Müslümovun məhkəməsində baş həkimə İRAD: "Kimdənsə qorxursuz?"

Keçmiş Əmək və Əhalinin Sosial Müdafiəsi naziri Səlim Müslümovun cinayət işi üzrə məhkəmə prosesi davam etdirilib.

Lent.az APA-ya istinadla xəbər verir ki, bu gün Bakı Ağır Cinayətlər Məhkəməsində keçirilən iclasda əvvəlcə Qarabağ müharibəsi əlilləri üçün Qazax rayonunda inşa olunan evlərin tikintisini həyata keçirmiş İbad İsmayılov dindirilib. Şahid məhkəmədə vəkili Cavad Cavadovla birgə iştirak edib.

İbad İsmayılovun dediyinə görə, o, ümumilikdə 22 ev tikib. Hər evə görə isə tikinti idarəsinə nəzarət edən Natiq Əzizova 6 min manat pul verib: "Əvvəllər usta işləyirdim, sonra şəhid ailələri və müharibə iştirakçıları üçün evlərin tikintisinə cəlb olundum. Bununla bağlı üç şirkət yaratdım, tenderdə özümə aid üç şirkətlə təmsil oluna bilməyəcəyim üçün ikisini yaxın qohumlarımın adına rəsmiləşdirdim. Hər evə görə 3-4 min manat gəlirim olmalı idi, lakin araya devalvasiya düşdüyü üçün vəziyyət dəyişdi. Buna baxmayaraq, 22 evə görə tikinti idarəsinə 132 min manat pul verdim".

Şahid prokuroru və Səlim Müslümovun vəkili Toğrul Vəliyevin suallarını da cavablandırıb.

Sonra Şəki Əlillərin Regional Bərpa Mərkəzinin baş həkimi Tərlan Qurbanov ifadə verib.

Şahid deyib ki, dərman vasitələrinin alınması üçün şirkətlə müqavilə bağlanıb. Şirkətə köçürülən vəsaitin bir hissəsi isə nazirliyin iqtisadiyyat şöbəsinin baş mühasibi Ülviyyə Məmmədovaya verilib: "Yuxarıdan tapşırıq gəlmişdi ki, köçürülən pulun bir hissəsi onlara çatmalıdır".

Şahid ifadəsini unutduğunu deyərək dövlət ittihamçısının və vəkilin sualına cavab verə bilməyib.

Prokuror Babaxan Həsənəliyev buna görə baş həkimə irad bildirib:

"Neçə illərdir rəhbər vəzifədə işləyirsiz, amma bir cümləni qurub deyə bilmirsiz. Bəlkə kimdənsə qorxursuz?".

Şahid qismində dindirilən Şəki şəhəri Suvarma Sistemləri İdarəsində qaynaqçı işləyən İlqar Mustafayev isə xəbəri olmadan adına tikinti şirkəti açıldığını deyib:

"2014-də prorab dedi ki, müəssisə yaradıram, bir sənəd var ona qol çək, oranın qaynaqçısı sən ol. 2021-ci ildə DTX-ya çağırdılar, dedim bu nə işdir mən düşmüşəm. Heç bilmirəm şirkət nədir."

Şahid Bəylər Musayev də eyni epizod üzrə ifadə verib. O, Şəki şəhərində yerləşən Suvarma Sistemləri idarəsində fəhlə işlədiyini bildirib. Bəylər Musayevin adına "Şəki Construction" MMC yaradıldığı bildirilib. Şahid məhkəmədə adına olan şirkətdən xəbərsiz olduğunu deyib.

 

Proses oktyabrın 3-də davam etdiriləcək.

 

Xatırladaq ki, Səlim Müslümov 2021-ci ildə Dövlət Təhlükəsizliyi Xidməti (DTX) tərəfindən həbs olunub.

Cinayət Məcəlləsinin 179.4 ( xüsusilə külli miqdarda ziyan vurmaqla mənimsəmə və israf etmə), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü (təkrar külli miqdarda rüşvət alma) maddələri ilə ittiham olunan sabiq nazir 13 ay həbsdə qaldıqdan sonra səhhətində yaranan problemlə bağlı ev dustaqlığına buraxılıb.

Səlim Müslümov cinayət işi ilə bağlı dövlətə dəymiş 27 milyon manatın 20 milyonunu ödəyib. Onun 8 milyon manatlıq əmlakı üzərinə həbs qoyulub.

# 2349
avatar

Oxşar yazılar

Azərbaycanda kişi kafedə öldü

Azərbaycanda kişi kafedə öldü

10 dekabr 2022 , 09:27
Bu yollarda  sürət həddi aşağı salındı

Bu yollarda sürət həddi aşağı salındı

9 dekabr 2022 , 22:46
Masallı sakini Lerikdə  güllələndi

Masallı sakini Lerikdə güllələndi

9 dekabr 2022 , 21:12
Naxçıvanda kişinin  asılmış meyiti   tapıldı

Naxçıvanda kişinin asılmış meyiti tapıldı

9 dekabr 2022 , 19:38
Polisdən  AXŞAM ƏMƏLİYYATI:   Dəmir yolu relslərini aparanlar tutuldu

Polisdən AXŞAM ƏMƏLİYYATI: Dəmir yolu relslərini aparanlar tutuldu

9 dekabr 2022 , 19:16
Bakıda "yağlı müştəri" qızıl satan qadını belə aldatdı

Bakıda "yağlı müştəri" qızıl satan qadını belə aldatdı

9 dekabr 2022 , 18:16
Məktəbdə  şagirdi döyənlər   polisə çağırıldı

Məktəbdə şagirdi döyənlər polisə çağırıldı

9 dekabr 2022 , 17:53
Bəxtiyar Hacıyev

Bəxtiyar Hacıyevə bu qədər həbs cəzası verildi - YENİLƏNİB

9 dekabr 2022 , 17:10