Rusiyada 1000-dən çox miqrantı leqallaşdıran iki azərbaycanlı həbs edildi

Sankt-Peterburqun Kuybışevski rayon Məhkəməsi qanunsuz miqrasiyanın təşkilatçısı olduğu iddia edilən iki nəfər barəsində həbs-qətimkan tədbiri seçib.

Lent.az-ın xarici mediaya istinadən məlumatına görə, Sankt-Peterburqda polis bir şirkət vasitəsilə mindən çox miqrantın Rusiyada olmasını leqallaşdıran qrupun fəaliyyətini aşkar edib və fəaliyyətini dayandırıb.

Fırıldaqçılar miqrasiya məqsədləri üçün qeyri-qanuni mühacirləri uydurma şəkildə qeydiyyata alıblar. Bunun üçün Kubinskaya küçəsi 80, B ünvanında, 77 nömrəli eyni küçədə yerləşən “Yujnı” miqrasiya mərkəzinin yaxınlığında ofis açıblar.

Faktla bağlı cinayət işi açılıb. İkisi Azərbaycan vətəndaşı olmaqla ümumilikdə beş nəfər saxlanılıb. Şahid qismində 3 Sankt-Peterburq sakini dindirilib. Saxlanılanların evlərində və iş yerlərində 15 axtarış aparılıb.

Araşdırma zamanı 10 ədəd mobil telefon, 11 ədəd fleş-kart, 2 ədəd noutbuk, 3 ədəd kompüter, 1 ədəd sistem bloku, əlyazma qeydləri, məsul şəxslərin çapı və imzası olan blanklar, mühasibat sənədləri götürülüb.

İttiham irəli sürülən iki Azərbaycan vətəndaşı, Rusiya vətəndaşlığı olan Ehtiram Şərifov və Samir Tağıyev olub. Onların hər ikisi rəsmi olaraq heç bir yerdə işləmir. Sankt-Peterburqda qeydiyyatdadırlar. Məhkəmə onların barəsində sentyabrın 14-dək həbs qətimkan tədbiri seçib.