Əməliyyatda ölən vəkillə bağlı TƏBİB-dən AÇIQLAMA

Xəbər verdiyimiz kimi Vəkillər Kollegiyasının üzvü Fuad Qasımzadə dünyasını dəyişib.

TƏBİB-dən Lent.az-ın sorğusuna cavab olaraq bildirilib ki, Qasımzadə Fuad Nail oğlu mayın 8-də səhər saat 09:10-da kəskin kalkulyoz xolesistit və yayılmış peritonit diaqnozu ilə Mərkəzi Neftçilər Xəstəxanasının Təcili yardım şöbəsinə müraciət edib.

Təcili yardıma müraciət edərkən vəziyyəti ağır qiymətləndirilib. Xəstədə fiziki müayinədə kəskin qarın və ağır septiki klinik əlamətləri mövcud olub. KT müayinəsi zamanı öd kisəsində güclü iltihab əlamətləri, öd kisəsinin içərisində çoxsaylı daşlar, bütün qarın boşluğunda çoxlu miqdarda maye izlənilib. Laborator analizlərdə qanda iltihab dəyərlərinin və qaraciyər-böyrək göstəricilərinin normadan çox olması müşahidə olunub. Xəstədə septik tablo və buna bağlı multiorqan çatışmazlığı əlamətləri müşahidə olunub.

Mayın 8-də xəstə Cərrahiyə şöbəsinə qəbul edilib. Konsiliumun qərarı ilə təcili cərrahiyyə əməliyyatı planlaşdırılıb. Əməliyyat zamanı xəstədə kəskin fleqmanoz qanqrenoz kalkulyoz xolesistit, yayılmış ödlü peritonit, sepsis və buna bağlı qaraciyərdə hepatit əlamətləri görülüb. Əməliyyatdan sonra Reanimasiya şöbəsinə yerləşdirilən xəstədə kəskin qaraciyər, böyrək və multiorqan çatışmazlığı davam edib.

Bir gün sonra saat 12:50-də görülən bütün tədbirlərə baxmayaraq, bioloji ölüm faktı qeydə alınıb.

Qeyd edək ki, xəstənin yaxınlarının dediyinə görə, Fuad Qasımzadə xəstəxanaya daxil olmazdan əvvəl başqa həkim tərəfindən ev şəraitində venadaxili infuziyalar, antibiotikoterapiya və güclü ağrıkəsicilərlə müalicə edilib.