Azərbaycanlı dünya çempionu qəsdən adamöldürməyə cəhddə suçlanır

O, Nabranda davada bir nəfəri bıçaqlayıb
Ağır Cinayətlərə Dair İşlər üzrə Məhkəmədə qaydasız döyüş üzrə dünya çempionu Sənan Dünyamalıyev və Zabit Ağalarovun cinayət işi üzrə məhkəmə prosesi başlayıb. Trend News-un mlumatına görə, qəsdən adamöldürməyə cəhd və xuliqanlıqda ittiham olunan şəxslər ötən ilin avqustunda Nabrandakı istirahət mərkəzlərinin birində istirahət edərkən 6 nəfər Xaçmaz rayon sakini ilə dava ediblər.
Prosesdə ifadə verən təqsirləndirilənlər özlərini elan olunan ittiham üzrə qismən təqsirli biliblər.
Bildiriblər ki, barda olarkən Xaçmaz rayonundan olan tanımadıqlar 6 nəfər şəxslər onlara sataşıb. Bundan sonra aralarında mübahisə yaranıb və həmin şəxsləri döyüblər.
Dünyamalıyev özünü müdafiə məqsədi ilə üstündəki bıçaqla həmin şəxslərdən birini bıçaqlayıb.
Proses iyulun 8-də zərərçəkmişlərin ifadələri ilə davam etdiriləcək.
Qeyd edək ki, Lent.az-ın araşdırması nəticəsində Sənan Dünyamalıyevin qaydasız döyüş üzrə yox, 2007-ci ilin noyabrında Özbəkistanın paytaxtı Daşkənddə keçirilmiş universal döyüş üzrə dünya çempionatının qalibi olduğu müəyyənləşib. “İnter” Peşəkar İdman Klubunun üzvü olan Dünyamalıyev 65 kq çəki dərəcəsində çıxış edir.