Bakıda toyda qadının və qohumunun qanını tökdülər - TƏFƏRRÜAT

Hüquq-mühafizə orqanlarından Lent.az-a daxil olan məlumata görə, şadlıq saraylarının birində keçirilən toy mərasimi zamanı dava düşüb.
1977-ci il təvəllüdlü Məmmədov İlqar Zülfüqar oğlu 1956-cı ildə anadan olmuş Nəziri Nehsət İbrahim qızını və onun yaxın qohumu Həbibzadə Fərhad Firuz oğlunu bıçaqlayıb. Yaralılar xəstəxanaya yerləşdirilib. Qasıq nahiyəsindən ağır xəsarət almış F.Həbibzadənin vəziyyəti daha ağırdır.

Hadisə barədə məlumat daxil olan kimi polis İ.Məmmədovun axtarışlarına başlayıb. O, tutularaq Nizami rayon Polis İdarəsinə gətirilib.

Lent.az-ın əldə etdiyi digər məlumata görə, hadisə toy mərasimində İ.Məmmədovun bəy və gəlinlə şəkil çəkdirmək istəməsindən sonra baş verib. Yaxalanaraq polisə gətirilən 35 yaşlı İ.Məmmədov bildirib ki, dostu ilə birlikdə toyun səbəbkarları ilə şəkil çəkdirmək istəyib və onlara yaxınlaşıb. Bu zaman gəlinin qohumları onların qarşısını kəsib və şəkil çəkdirməyə icazə verməyib. Nəticədə dostlar onlarla davalaşıblar və İ.Məmmədov özü ilə gətirdiyi bıçaqla F.Həbibzadəni və 56 yaşlı qadını vurub.

Hazırda fakt üzrə araşdırmalar davam etdirilir.

Nizam RZA