Narkotik ticarətinə qarşı mübarizə nazirinə 38 il HƏBS CƏZASI

İllər boyu Meksikanın narkotik ticarətinə qarşı mübarizəsinə rəhbərlik edən nazir Genaro Qarsiya Luna, mübarizə aparmalı olduğu kartellərdən rüşvət aldığı üçün ABŞ-da 38 ildən çox həbs cəzasına məhkum edilib.

Lent.az “Reuters”ə istinadla xəbər verir ki, çərşənbə günü Bruklin federal məhkəməsində keçirilən dinləmədə ABŞ-ın Dairə Hakimi Brayan Koqan hökm elan edib.

Prokurorlar, 56 yaşlı Qarsiya Lunanın 2023-cü ilin fevralında narkotik vasitələrin qanunsuz dövriyyəsində iştirak etməkdə, müxtəlif sui-qəsdlərdə iştirak etməkdə və yalan ifadələr verməkdə təqsirli bilindikdən sonra onun ömürlük həbs olunmasını istəyiblər.

Onlar Qarsiya Lunanın vaxtilə “El Çapo” kimi tanınan Xoakin Quzman Loeranın rəhbərlik etdiyi Sinaloa kartelindən milyonlarla dollar rüşvət aldığını və bunun müqabilində üzvlərini həbsdən qoruduğunu iddia ediblər.

“Reuters”in qeyd etdiyi kimi, Qarsiya Luna 2006-2012-ci illərdə Meksikanın ictimai təhlükəsizlik naziri vəzifəsində çalışıb.