Atatürkün yaxtasında fahişəxana təşkil olunurmuş!

Lent.az-ın Türkiyənin “NTV” telekanalına istinadən verdiyi məlumata görə, bu barədə 7 ay əvvəl Antalya Jandarma Komandanlığına məlumat daxil olub və jandarma texniki təqibə başlayıb.

Bu gün polislər Antaliya, Bələk və İstanbul istiqamətlərindən eyni vaxtda qayıqlarla Muğla Göcekdə lövbər salmış “Savarona” yaxtasına yaxınlaşıblar. Əməliyyatla bağlı hələlik geniş məlumat verilmir.

Türkiyə mətbuatı yazır ki, “Savarona” yaxtasını günü 50 min dollara kirayələyən cinayətkar qrup Rusiya və Ukraynada maniken agentliklərində qeydiyyatda olan qızları Türkiyəyə gətirib, bu yaxtada fahişəxana təşkil edirlərmiş.

Qeyd edək ki, 1931-ci ildə 4 milyon dollara tikilən “Savarona” 7 il sonra, 1938-ci ildə Türkiyə tərəfindən satın alınıb və Atatürkün ixtiyarına verilib. Atatürk bu yaxtada hökumətin iclasını keçirib, dünya liderlərini qəbul edib. Atatürkün vəfatından sonra yaxta Türkiyə Gəmiçilik İdarəsinə verilib. 1989-cu ildə isə yaxta Kahraman Sadıkoğlu tərəfindən 49 illiyinə satın alınıb.