Obama məscidi ayaqyalın gəzdi

ABŞ prezidenti Barak Hüseyn Obamanın Türkiyəyə səfəri davam edir.
Lent.az-ın Türkiyə mətbuatına istinadən məlumatına görə, dünən Ankaradan İstanbula gedən Obama bu gün “Conrad” otelində ABŞ-ın İstabuldakı Baş Konsulluğunun əməkdaşları ilə görüşüb. Mətbuata qapalı keçirilən görüşdən sonra Obama dini icmaların təmsilçilərini qəbul edib.

Daha sonra şəhəri gəzməyə çıxan ABŞ prezidenti əvvəlcə Ayasofiya muzeyinə gedib. Muzeyi heyranlıqla gəzən Obama tarixi abidə haqqında sadəcə, “möhtəşəm” deməklə kifayətlənib. Obama oradan piyada Sultan Əhməd Camesinə keçib. ABŞ prezidenti məscidə girərkən ayaqqabılarını çıxarıb, ayaqyalın gəzib, qadın tərcüməçisi isə başını yaylıqla bağlayıb.

Oradan Tophaneyi Amiredəki muzeyi ziyarət edən Obama sonra universitet tələbələrinin suallarını cavablandırıb. ABŞ prezidenti tələbələrin PKK terror təşkilatı ilə bağlı sualına “Türkiyənin ərazi bütövlüyünə hörmət edirik, bu bütövlüyü bölmək istəyən qüvvələrin qarşısındayıq”, - şəklində cavab verib.