1 milyon dollarlıq xəritə

ABŞ Konqresinin kitabxanasında qiyməti 1 milyon dollar olan 4 əsrlik xəritə nümayiş olunur

1602-ci ildə Çin imperatoru Vanlinin istəyilə Pekində yaşayan italyan missioner Matteo Ricsinin çəkdiyi xəritə ABŞ Konqresinin kitabxanasında nümayiş olunur.

Lent.az-ın Türkiyənin “Vatan” qəzetinə istinadən verdiyi məlumata görə, qısa qeydlərin də yer aldığı bu xəritədə Çin dünyanın mərkəzi kimi göstərilir.

Dünyanın ən yüksək dağ zirvəsi və ən uzun çayının Afrikada olduğu qeyd edilir. Şimali Amerika da xəritədə yer alır, bizonlar, bu materikdəki vəhşi atlar və “Ka-na-ta” adlı bir bölgədən bəhs edilir. ABŞ-ın Florida ştatı “Çiçəklər diyarı”, Avstraliya və Antarktida "Magellanica" adlandırılır.

Bu, dünyanın ikinci ən bahalı xəritəsidir. Kartoqrafiyanın “Qara Laləsi” adlandırılan bu xəritə keçən ilin noyabr ayında 1 milyon dollara satın alınıb. Xatırladaq ki, Amerika adının çəkildiyi ilk xəritə Valdseemullerə məxsus dünya xəritəsidir. Bu, dünyanın ən bahalı xəritəsidir, qiyməti 10 milyon dollardır.