“Donuz qripi” Avropa Şurasında!

Avropa Şurası əczaçı şirkətlərin qazanc əldə etmək üçün “donuz qripi” təhlükəsini şişirdikləri yönündə iddiaları araşdıracaq

Avropa Şurası Parlament Assambleyası (AŞ PA) “donuz qripi” təhlükəsinin dərman istehsalı ilə məşğul olan şirkətlər tərəfindən məqsədyönlü şəkildə şişirildiyi yönündə iddiaları araşdırmağa qərar verib.

Lent.az-ın ensonhaber.com saytına istinadən verdiyi məlumata görə, keçən həftə AŞ-ın Ailə və Səhiyyə Komissiyasının sədri Volfgang Vodarg və Türkiyədən 2 millət vəkili də daxil olmaqla, 14 avropalı parlamentar AŞPA-ya bu məsələnin araşdırılması ilə bağlı müraciət edib.

Volfgang Vodarg deyib ki, “donuz qripi” əczaçı şirkətlərin rəvac verdikləri saxta bir epidemiyadır və bu, əsrin ən böyük tibb qalmaqalıdır: “Əczaçı şirkətlər patentli dərmanlarını satmaq üçün elm xadimlərinə və səhiyyə ilə bağlı rəsmi qurumlara təsir göstərərək, dünya miqyasında hökumətlərin fövqəladə hazırlıq vəziyyətinə keçməsinə nail oldular”.

O bildirib ki, Ümumdünya Səhiyyə Təşkilatının AH1N1 virsununun epidemiya sayılması haqqında qərarı da əczaçı şirkətlərin təsiriylə qəbul edilib: “5 il əvvəl də “quş qripi”nin guya insana yoluxacağı ilə bağlı ilə bağlı belə qorxulu iddialar atıldı, nəticədə əczaçı şirkətlər milyonlarla dollar qazanc əldə etdilər”.