Təbrizdə 19 restoran qapadılıb, 62 nəfər tutulub

Yayda isti havalarda əsasən, qadınların hicab qaydalarına əməl etməsinə nəzarət edilirdisə, soyuqda daha çox bağlı yerlər, çayxana və restoranlarda bu istiqamətdə «yoxlamalar» aparılır.

Ötən gün Təbriz polisi «şəriət qaydalarını pozan obyektləri aşkar etmək» üçün 75 restoranda reyd keçirib. Şəhər Polis İdarəsi ictimai iaşə obyektlərinə nəzarət şöbəsinin rəisi Əlirza Hünərdust bu barədə açıqlama verib.

O, 19 restoranın bağlandığını deyib: “Əməliyyat nəticəsində fəaliyyəti dayandırılan restoranlarda şəriət qaydalarının pozulduğunu aşkar etdik. Həmin obyektlər müştərilərə gənclərin çox maraq göstərdiyi qəlyanlar təklif edirlər. Ora kişilərlə yanaşı, qadınlar da gedir və başları açıq şəkildə qəlyan çəkərək, oğlanların diqqətini cəlb edirlər. Şəriət qaydalarına əməl edilmədiyi üçün 19 restoranın qapısına möhür vuruldu, reyd zamanı həbs edilən 62 nəfər isə polis idarəsinə təhvil verildi. İstintaq bitəndən sonra onların məhkəməsi keçiriləcək”.