Xiaomi 2026-cı ilin ən ucuz smartfonunu təqdim etdi: Redmi 17C nələr təklif edir?

Xiaomi büdcə seqmentinə aid yeni Redmi 17C modelini təqdim edib.

Lent.az xəbər verir ki, şirkət bu cihazı 2026-cı il üçün məhsul xəttindəki ən sərfəli smartfon kimi göstərib.

Redmi 17C-nin 4 GB operativ yaddaş (RAM) və 128 GB daxili yaddaşa malik versiyasının qiyməti 115 ABŞ dollarıdır.

Redmi 17C-nin texniki xüsusiyyətləri

Yeni smartfon 6,88 düymlük LCD ekranla təchiz olunub. Ekran 120 Hz yenilənmə tezliyi, 240 Hz toxunma cavab tezliyi, DC Dimming texnologiyası və göz yorğunluğunu azaltmağa kömək edən TÜV Rheinland sertifikatına malikdir.

Cihazın performansına enerji səmərəliliyinə yönəlmiş MediaTek Helio G81-Ultra prosessoru cavabdehdir. Bu çip gündəlik istifadə üçün nəzərdə tutulub.

Smartfon 5160 mAh tutumlu batareya ilə təchiz edilib və 18 vatt gücündə sürətli enerji yığmanı dəstəkləyir.

Kamera və əlavə imkanlar

Redmi 17C-nin arxa panelində dairəvi kamera bloku yerləşir. Əsas kamera 13 meqapiksel, ön kamera isə 5 meqapiksel təsvir ölçüsünə malikdir.

Modelin üstünlükləri arasında yan hissədə yerləşən barmaq izi skaneri və 3,5 mm qulaqlıq girişi də yer alır. Smartfon HyperOS 3 əməliyyat sistemi ilə işləyir.

Rəng seçimləri və satış tarixi

Redmi 17C hazırda mavi, qırmızı (dəri teksturalı) və qara rənglərdə təqdim olunur.

Hazırda model yalnız Çin bazarında satışdadır. Şirkət qlobal versiyanın da yaxın vaxtlarda təqdim ediləcəyini açıqlayıb.